يابحر الدمع حاجيني .... وينه القى الصبر دليني

عقب الكرار....... فكري احتار

وين القى الصبر دليني

لابارحت عمري يريت الونة ولا غارب الدمع

شتتمنى قالوا لي قلت شتمنى اتمنى نعشي تشيع

جفوف القدر فتحت ابواب الجنة بوجه البطين الانزع

لاجن ابواب النار فتحت النه جمر القهر يتلفع

كلما زيدت عبراتي .... يتزايد لهب جمراتي

احمل جم نار .... فكري احتار .... وين القى الصبر دليني

درب الصبر ضاع بمصيبة حيدر بس الدمع واساني

حاولت ابحث عالصبر واتصبر مامن شهم دلاني

ظليت انازع بين ناري التسعر مابين دمع احزاني

لاناري نشفت موج دمعي الاحمر ولا هالدمع طفاني

شلون انفض غبار همومي .... وغراب المصيبة يحومي

بموج الافكار .... فكري احتار .... وين القى الصبر دليني

جيوش القهر فلت سواعد عزمي واستوحدتني النكبة

وعيون ضيمي نايبات وهمضي تترفد وتتربى

مو دم علي جن تسافح دمي ويجري لجلالة ربه

اي والهتف ياموت سجل اسمي فزت ورب الكعبة

مو هامة المطبوره .... اشعر هامتي المشطوره

سيف الاقدار .... فكري احتار .... وين القى الصبر دليني

بسيف الضلالة انطبر راس التوحيد وهالت وهج مستعره

وقلب الجحيم تسجر وناره تزيد مم اثر نار الطبرة

بين الايادي وطاح من ايد لايد قلبي وتفرهد صبره

هات الصبر يا دهر واطلب شتريد ما عندي هالهم قدرة

سلمت القلب للحسره .... وانطيت الجفن للعبره

بروج الاعبار .... فكري احتار .... وين القى الصبر دليني

تتعثر اجدام القهر بجروحي جرح الوكت ما يلتم

والنوح ظل يبجي وينوح لنوحي وبيه الالم يتألم

صارت تكابر عالموازم روحي تسحق على متون الهم

وشلون ينشف سيل دمعي وموحي حيدر تخضب بالدم

عيني على الجرح مشبوحه .... جن طبرة علي المفتوحه

عقب الي صار .... فكري احتار .... وين القى الصبر دليني