دار الوحي مرجونه.... والحيدر يودعونه

والفلك وضعه تغير..... والملك دمعه فجر

والحيدر يودعونه

هالله هالله شهالموادع غير الكون ونظامه

زلزل العالم العلوي وماجت أركان الإمامه

والگمر نوره تغيب وغربت شمس السلامه

والحلم صيوانه إنهدم ....والصبر مصيوب بسهم

ولمن نشف بحر الكرم ....يبس گلوب اليتامه

يفگدهم يفگدونه.....وبرواحهم يفدونه

وبمصيبته صوبهم....وبطيحته سيبهم

والحيدر يودعونه

روحي شاطت وبدليلي النار تتواگد مشاعل

ولعد رابع سما توجه ضامري والدمع هامل

شفت آثار المصيبه والملك صاعد ونازل

منهم بمحرابه هووا ....بآثار دمه تخضبوا

ومنهم لعد راسه إگعدوا ....ورتلوا قرآن كامل

واشرافهم ينعونه..... من رادوا يضمدونه

گطعوا هرش الدلال....ضمدوا جرحه الچتال

والحيدر يودعونه

چني أسمع صوت يدوي ودهش فاكرتي برهيبه

صوت جبرائيل ينده ويصرخ بصرخه غريبه

والأفلاك العالميه إنصابت بفتره عجيبه

والأنبياء تهيأت ....وبصوره قدسيه إنزلت

بتوديع ابو حسين إحضرت ....وشاركتنا بهالمصيبه

للمصطفى يواسونه......وواجبهم يأدونه

أدووا المعروف بهاي.....وگعدوا يگطروله الماي

والحيدر يودعونه

حيدر بحاله خطيره ينازع يجود بمهجته

واهل بيته تحوم دونه وكلمن يكفكف دمعته

صد لبو محمد وشافه بصدره تتكسر عبرته

وإنكسر گلبه على الحسن ....ناداه ودموعه جرن

عالدين إنت المؤمن ....وجهدك وجهدي إحتسبته

وضلع الصبر تحنونه.....عالدين وتحامونه

وإنغشى عليه وتغير....وصوت النوايح كبر

والحيدر يودعونه

وإنتبه حيدر ونادى يا عزيز مودع الله

بالأرامل واليتامى يولدي هالله هالله

وريت زينب ما تشاهد لا هوان ولا مذله

وعباس من دون إخوته ....فورت دمه شيمته

ودهشت المحضر حسرته ....والمفافر مو محله

صوت البچى يخفونه..... لوالدهم يراعونه

لا ينخدش دلاله..... بضجة صريخ عياله

والحيدر يودعونه

بحالة الإغماء حيدر فاق والحاله ثچيله

وسلم الرايه لفتاها وزرگ عينه على العقيله

صاح زينب هاي زينب والدمع فجر مسيله

خدرچ بهالرايه إنرصد ....والرابض بحدها أسد

عباس إلچ نعم الضمد ....وفي وما يحصل مثيله

عباس يهتف عونه.... عودي وگرعيونه

من احمل باليمين الجود... والهاشميين شهود

والحيدر يودعونه

آه يا گلب العقيله بسهم الموادع تمرد

تمثلت مصرع وليها بجسم والدها المدد

وانبعت عناها شافت كربلا وخدر المفرهد

وتصورت حرگ الخيم ....وصاحت يفاروق العلم

وين المراجل والشيم ....وين صواني المشيد

صيوانچ يشيدونه... والخدرچ ينطرونه

ولو عطشوا عيال حسين.... يرويهم بماي العين

والحيدر يودعونه