وين أروح ألغير بابك وين أروح ... يلي حبك بلسم ألكل الجروح

أنثر رموشي أعله أعتاب الشرف ... يمك إجيت

يالحسن ولساني صرّح وأعترف ... بيك إلتجيت

* * *

حبك أحياني بشعوري أشلون محيه ... عقلي من جن أبجلالك زاد وعيه

يلوجودك عجزت أتنافيه خفيه ... عميه عين ألما يشوفك و الله عميه

كل من ألبابك سعه ما خاب سعيه ... بيك يضمن آخره ويضمنها دنيه

ما يخيب أليمتلك مثلك حبيب ... يلجروح أتغازلك أروع طبيب

أمحبتك روح أبجسم روح ألهتف ... بيها أحتييت

يلحسن ولساني صرّح وأعترف ... بيك ألتجيت

* * *

ملجأي أوراده أعوفه أشلون أكابر ... وآنه عمري ما كنت عنك أغادر

حبك أمضي لو زرع دربك خناجر ... أمشي جسمي وأوصلك روح و خواطر

لحّد يلوم الذي حبك يساهر ... على أعتابك ينثر رموش النواظر

يا سهر ليل ألتواصل بالنهار ... ليك أحن و من حنيني أعليك أغار

حقي من كثر المحبة لو ذرف ... دمعي أوبﭽيت

يلحسن ولساني صرّح وأعترف ... بيك إلتجيت

* * *

مثل أوراق الشجر عشت أبربيعك ... وأعله كل قطرة ندى أشكر صنيعك

العمر أبيعه وعمري ما أفكر أبيعك ... عبدك آنه أبأمرك اونهيه أطيعك

لو تفتش قلبي يامُهجة وديعك ... تلقى شخصك ساكنه أوقلبي بقيعك

ﭽذب عن قلبي أحسنّك بعيد ... وأنته أقرب ليّه مِن حبل الوريد

هذي كل نبضاتي سابيها الشغف ... وآنه أنسبيت

يلحسن ولساني صرّح وأعترف ... بيك إلتجيت

* * *

أنته من كنز الجلالة مبني صرحك ... أنته كاف اونون أمره عرّفني منحك

بالكرم واضح بعد واشلون أوضحك ... أخاف أحجي أبﭽلمة وألساني يجرحك

بالسحب لو ردت أشبهك ما أمدحك ... هيه تعطي تبجي وأنته تعطي تضحك

يا كريم وحبك أعظم كل عطاء ... ما أبدله حتى بنجوم السماء

سيدي وبكل ثمن غالي أنعرف ... لا ما ارتضيت

يلحسن ولساني صرّح وأعترف ... بيك إلتجيت

* * *