هذا الحسن منصرع...لو هذا جاسم

ما أدري شنهو الجره...هذا الحسن عالثره ...لو هذا جاسم

للحرب لمن راح ضج الدليل و صاح و ادموعي تجري

روحي الغريبه اتنوح صاحت يبعد الروح جاسم يذخري

شمعة شبابك هاي معلوقه بين إحشاي و ابروحي تسري

من دم يسيل الدمع ...و القلب هايم

لخيامي صار الفزع... نادي الهواشم

روحي بقت حايره...هذا الحسن عالثره ...لو هذا جاسم

ما وجد و لا شوف صار البصر مكفوف لمن نظرته

ما ميز ابعيناي تاه الفكر و الراي لا ما عرفته

رديت إلي مذبوح دم هامتك... مسفوح ابهمي حطنتك

علقت العرسك شمع ...كل الفواطم

سجرت حدر الضلع ...نار الهضايم

أصرخ و دمعي جره...هذا الحسن عالثره ...لو هذا جاسم

ما بينك و ما بين لكبر عزيز حسين وسدت قلبي

و صرت ألطم ابجفين و أرد أطفي نور العين خل يقضي نحبي

راسي انخضب بدماك اتوسدت وياك و اذكرت تعبي

صوت الهضم مرتفع ...يا ريته سالم

و شفت النحر منقطع... ابشفرة الصارم

و كل فكري اتصوره...هذا الحسن عالثره ...لو هذا جاسم

هذا الحسن مذبوح لو جاسم المطروح خبروني عنه

هالفاجعه احتاريت هذا الحسن ناديت لو هذا إبنه

اجفوفه ابجيع الراس خضبها يا هالناس لو هذي حنه

منك أريد أستمع... يا بو الملاحم

أنظر لك ابيا وضع ...عالغبره نايم

امحيره و متكدره...هذا الحسن عالثره ...لو هذا جاسم

رمله آنه يا جسام يا منيت الأيام وحدي عفتني

لو كثرت الآلام يحله اللطم عالهام ريتك شفتني

ما طبق جفني و نام فقدك رماني إسهام يالصوبتني

فقدك فلا ينجرع ...و بحيلي هادم

يوليدي انت نبع... بحر المكارم

خبرني يا هالتره...هذا الحسن عالثره ...لو هذا جاسم

اتنوح الفواطم هاي نصبت مناحه اوياي يبني المصابك

ابعينك شفت يا ريت اجفوف و شعر حنيت من دم خضابك

لتظن يا يمه أنساك و أنسه ليالي ارباك و أهنه ابغيابك

انت الذي متطلع ...و ابوضعي عالم

من نوحي ما أمتنع ...رغم اللوايم

ظليت أنا امحيره...هذا الحسن عالثره ...لو هذا جاسم