دينية دينية سلطنه و دينية

دينية  دينية……سلطنة  ودينية
سلطنة حامي الجار….نص عليها المختار
سلطنة  ودينية….حكمة  ربانيه

سلطنة  حيدر من مراسيم الدين صادر أمرها ……والأمر صدّرها
تبشر محمد بيها من التكوين وابتشر بيها……… ولمّته  بشّرها
وتدونت باللوح يوم التدوين والقلم حرر……….. والوحي  قررها
رسمية رسمية….. مصدقة ورسمية
بستناد الآيات … بعتراف  الطاعات
مصدقة ورسمية….حكمة ربانيه

سلطنة ومغروسه بصميم الإسلام ثابت غرسها ……والرسول  أغرسها
گبل الوجود ومن گبل حام وسام قدست سرمد…………. سرمد القدسها
وشرعت قوانين ومناهج وأحكام يصعب درسها.. ….. وناجح اليدرسها
علمية  علمية  ……. نابغه  وعلمية
والعلم  يتفجر …… من بلاغة  حيدر
نابغة وعلمية……حكمة  ربانيه

للدين  من  نظّم محمد دستور لهل الديانة …… ومن لطف  ديّانه
وبصهوة الدين إنبنى عرش النور وسلطانه حيدر …. واعتله  بسلطانه
هالعرش ما يتزلزل النفخ الصور ثابته اركانه ….والعقيده  أركانه
مبنية مبنية …… عالعدل مبنيه
والأساس القرآن …. والبناه الإيمان
عالعدل  مبنيه  …. حكمه  ربانيه

صيّغ الباري لسلطنة حيدر تاج وعقود جوهر … من معاني الجوهر
من كوكب الدر وسراج الوهاج تاج وتصور ….. من بهاء  الصّور
شافه محمد من صعد للمعراج بالبيت يزهر……..والمتوج أزهر
روحية       روحية       ….       سيطرة      وروحية
من  مضامين اللوح …. والعلن بيها الروح
سيطرة  وروحية  …. حكمة ربانيه

سلطنة ورصدت بالعوالم مرصد خوض بعلمها ….. واكتشف  عالمها
جن  وأنس  تتطوع وتتجند تخدم عالمها …. والملك  لازمها
حيدر  ملكها وبالرسول تأيد منه إستلمها …. ولعترته  سلمها
ذرية         ذرية         ….         للهادي         ذرية
گامت بأمر الدين…. تسعه غير السبطين
للهادي      ذرية      ….     حكمة     ربانيه