خضبت صبحك بالدم يصابر

خضبت صبحك… بالدم يصابر
يا علي إبجرحك …رايح  تسافر
ما إلك جيه…إبدرب المنيه…رايح تسافر

زينب  على  باب الفجر من عينها إتبده الصبر…و القلب ضج  إبخوفه
قدامها  أشباح الحزن ينضم دمعها إبيا جفن…و ينزف إبوها  إتشوفه
دم  الشهاده إمخضبه و عالعين نازل حاجبه…بيه غدر سيف  الكوفه
و الحسن هذا إيضمده وحسين يمه إيساعده…و يمسح الدم  بجفوفه
زينب ألمها… فاض إبدمعها
ليلة يتمها …جمره إبضلعها
التقعد إبفيه…إبدرب المنيه…رايح تسافر

إبسفرة  الموت إتودعه و هذا السفر ميرجعه…و الموت ميرد  إغياب
صاحت يبويه إبسفرتك من يضوي ليل إبغيبتك…و أظلم تعيف  المحراب
ما يطفي جمرات الدمع و أحزاني من يوم الضلع…و الجرح بعده ما طاب
بعدك  أظل  بيد القدر و إتعيفني إبهذا السفر…وحشة مكانك و  إمصاب
من       ضلع       أمي…      تنزف      إجروحي
و  بهذا يتمي …إشتتمنه  روحي
هالسفره ليه …إبدرب المنيه…رايح  تسافر

إتمنيت ليلي لا صبح من يوم صدر إمي إنجرح…و بقلبي بعده المسمار
و اليوم تنزف هامتك و الدم يخضب شيبتك…شنظر بعد يا كرار
من  بعدك إيدور الزمن و إقبالي هم ألقه الحسن…جبده وذر بالسم  صار
و  ليل  الحزن ما ينجلي إويه حسين تدري يا علي…إتودين وين  الأقدار
أمشي       بأحزاني…       آنه       و        إخويه
للطف زماني… ياخذني  بويه
و جم جرح بيه …إبدرب المنيه…رايح تسافر

من  جرحك إجروح إشكثر أتلقه من بعد الصبر…تاخذني للطف  دنياي
هاليوم ما بين الأهل إنت على إفراش الأجل…و كل إخوتي يمك  هاي
هاليوم  عباس القمر يمك إبساعات السفر…إيقدم لك إبجفه  الماي
لاجن يحماي الحمه باجر إبساعات الضمه…ما يظل عباس إوياي
و      إبظهر      عاشر      …لا      ما      أشوفه
عالنهر  باجر …إتسحق  إجفوفه
خيل آل أميه…إبدرب المنيه…رايح  تسافر

راسك إبيوم النايبه بيده الحسين إيعصبه…و ما لقه الجرحك  طيبه
و راسه بعد هذا الجرح ألقاه يبويه إعله الرمح…و يقطر الدم من  شيبه
و  إفراش  إلك إنت إنفرش هو عله إتراب العطش…قبل السحق  تسليبه
هاليوم يمسح جبهتك هو يبويه إبغيبتك…سهم المنيه  إيصيبه
إتنازع و إنته… الحاله تتألم
تنسحق  جثته …و صدره  إيتهشم
بالغاضريه…إبدرب المنيه…رايح تسافر

هالليلة ما بين إخوتي إتودعني و أبقه إبحيرتي…لو غبت عن  إعيوني
و إبوحشه إمجانك أظل و بخوتي عندي أمل…هم الذي يرعوني
يا جرح بعدك انتظر لا إخوه تبقه و لا خدر…و بكربله  إيعيفوني
باجر يبويه أنسلب أعطش و بسياط أنضرب…من العده  يسلبوني
أنظر إحسينك… منذبح  ضامي
يا علي وينك… حرقوا  إخيامي
لهبت عليه…إبدرب المنيه…رايح  تسافر