ترويها
المستهل :
ترويها ترويها
رادتك ترويها
عطشانه الاطفال
تربي اعله المسنايه وينك يراعي الرايه
عطشانه الاطفال
***
1
حامل الواء التضحيه والايثار
بدر الهواشم مارجع لخيامي
اتمنه شبل المرتضى حامي الجار
يرجعلي سالم حتى يروي ايتامي
مو طبعه يتأخّر عليْ فكري احتار
هاي الفواطم من عليها ايحامي
* تحميها تحميها
يالكلت تحميها بالشده العيال
اسمع بنات الهادي بين الخدور اتنادي
عطشانه الاطفال
***
2 بخيامي عطشانه الحرم والاطفال
ظلت اتعاني كلي جودك وينه
هالغيبه طالت وانتظر مو عالبال
هالكد نتاني والهظم والينه
من آل أميه ياكمر اشكي الحال
مومن زماني خويه ردْ اعلينه
رد ليها رد ليها
ياكمر رد ليها صد عنها الارتال
زينب يهل مدمعها كونك تجي او تسمعها
عطشانه الاطفال
***
3
عطشانه روحي الشوفتك مو للماي
يبن الصميده عذّبِت دلالي
محتاره مابين الكفر ترضه ابهاي
اختك وحيده ابكربله يالغالي
بعدك يسبع الكنطره دهري اوياي
سوّه اليريده والغرب تبرالي
تدريها تدريها
تنهظم تدريها هاي اخت الابطال
صعبه الكفر تشتمها اوتتمنه حاضر يمها
عطشانه الاطفال
***
4
عذبت حالي امن الضمه اطفال حسين
مدمعها جاري اوجودك امتانيته
تنشدني عنك يا كمر جودك وين
ماطفت ناري والصخر بجّيته
يالواعدتني والوعد عندك دين
طال انتظاري 0 اوكلبي الك ودّيته
* تحديها تحديها
والجنت تحديها اوتبره الها خيّال
جار الزمان اعليها اوبين الغرب تاليها
عطشانه الاطفال
***
5
كونك تشاهد بت علي بيها اشصار
يامن عفتها تنتظر مالومه
لا والي عدها بالخيم لا انصار
والخيل اجتها فازعه امن الحومه
عافت خدرها ابكل كتر يلهب نار
كونك شفتها من بجت مهظومه
مَرْ بيها مَرْبيها
كل هظم مَرْ بيها مامَر على البال
اخيمها الكفر حركتها وبلا خدر خلّتها
عطشانه الاطفال
