جرح جبدك....... حفر لحدك

متت وحدك....... مثل جدك

عشت صابر....... بلا ناصر

متت طاهر....... مثل جدك

* * * * *

إلك يا أسمح العالم يمين و بالكرم أكرم

مناقب من إله الكون كمل بيها الكمال و تم

يبن من وفدوا اعله الموت ابجلابيب الذبح و السم

ابشبابك صافحت موتك شهيد و للعلم معلم

العهد صنته....... و لا خنته

و تظل إنته....... الوفي ابعهدك

جرعت السم....... و لا مهتم

حملت الهم ....... مثل جدك

* * * * *

الجواد إنته جدت بالروح كريم و للنفس باذل

ابفتوة عمرك و تحمل صفات الكامل الفاضل

ما حملتك نفسك يوم تهادن زمرة الباطل

مشيت ابسيرة أجدادك سبيل النهضه متواصل

و مشت روحك عله اجروحك

اتركت نوحك....... هدف عندك

ابهدف واحد ....... عشت صامد

و تظل خالد....... مثل جدك

* * * * *

الإمام التاسع و علمك يثبت كل براهينك

يسارك رحمة التيسير و بحر للمكرمه ايمينك

ابلغت أعله الرتب بالجود فديت ابنفسك الدينك

إمام و ما رعوا قدك اغدروا بأول اسنينك

ابعزم يرهب....... مجد تكسب

و رحت تكتب ....... صحف مجدك

ابمجد سامي....... القلب دامي

متت ضامي....... مثل جدك

* * * * *

ضمير المعتصم مسلوب من كل معنه للرحمه

اغدرك يا تاسع الأقمار ابجوره و سلطته و ظلمه

مثلما سهم المثلث قطع جبد أبو اليمه

رماك المعتصم بالجور قطع جبدك ابسهمه

الوحي و شرعه ....... يصب دمعه

السنن تنعه ....... و تحن بعدك

الأجل نالك....... و تعنى لك

يا من حالك ....... مثل جدك

* * * * *

ابهضاب الغاضريه اهناك لمن جدك اتوذر

ثلثتيام ظل جسمه رهين و بالثره امعفر

و إنته اعله السطح جسمك مرهون ابهجير الحر

ثلاثه ابلا دفن و اتريد تواسي صاحب المنحر

الحزن ظاهر....... القلب شاجر

و يظل ساجر....... جمر فقدك

الدهر أعلن....... حداده و حن

دليلك ون....... مثل جدك

* * * * *

بني أحمد رماها الموت صرعه اعله الأرض سجد

هذا اللي وقع مذبوح اعله وجه الباديه اموسد

و هذا اللي خدف جبده و بالسم ضامره اتمرد

من كل جانب أسمع صوت صبراً يا بني أحمد

تسح عبره....... و تشب جمره

عله الغبره ....... انفرش خدك

ابجبد ينزف....... دمه و يضعف

خضت موقف ....... مثل جدك

* * * * *

أنوحن يالجواد اعليك ابكل ما بالقلب إحساس

نعشك سيدي شالوه و شهدت مدفنك هالناس

لاجن جدك المظلوم دفنوا جثته ابلا راس

يومه انشبه ابيا يوم و حزنه ابيا حزن ينقاس

مصاب الطف....... ميتوصف

و فنه المرهف....... أهل ودك

إلك مجمل ....... فلا يوصل

و لا يحصل....... مثل جدك

* * * * *