مناقب ألإمام علي عليه السلام

«ميمر مذيل»

ناجح ابكل صوره حيدر او دستوره

حربي اوسياسي

ديني او أساسي

نظم المعموره حيدر او دستوره

والصَّور العالم جعل تمهيده ابنور الهدايه

والفلك گطبه او نزلته او تصعيده للحكمه آيه

واعلى الخلگ فارض عگب توحيده حب الولايه

وحيدر ايوالونه شيعته ايقدسونه

ابأمررباني

او ما إله ثاني

اوخطته المأثوره حيدر او دستوره

منهو انولد بالكعبه غير اللي چان للكعبه مرصد

او أول رجل من الرجال ابايمان سالم محمد

او تزويجه صار ابركن عرش الرحمن والملك يشهد

انتبه واتصور حيدر اشيتقدر

جوهر اعلومه

علمي من يومه

وللعلم نافوره حيدر او دستوره

حيدر أمير الملحمه او سلطانه ابشفرة الصارم

وعالمؤمنين إتأمر ابإيمانه ابكل العوالم

سبحان رب الملّكه سبحانه وابعلمه عالم

ابعلمه وبآدابه والعلم وابوابه

ابوجها مفتوحه

اوالنه ممنوحه

نعمته المشكوره حيدر اودستوره

لوگلت حربي الحرب تاريخه ايگول حيدر أميره

والشاهد الثاني الأمين المرسول وضح نصيره

واعلى الشرك سيف الإله المسلول لا تعد غيره

خيبر او غزوتها من ملك رايتها

منهو ركزها

او منهو عززها

او رفرفت منصوره حيدر اودستوره

وين اليضاهي حيدره ابكل عمره بالله ارد انشده

منهو الصرع عمرو او تثنه ابصدره والجيشه صده

ولمن سكن غيضه ابجهد حز نحره الوجه الله جهده

ومنهو فل أحزابه او منهو صفه احسابه

غير حامينه

وانتصر دينه

وهذي مو منكوره حيدر او دستوره

يالمسهر اعله الدين متريح نام واركن ابظله

دينك او دستوره او نظام الإسلام متصيبه خله

وراية محمد ملتزمها الضرغام قائد المله

حيدر الخلاها اويالزمن مسراها

آية جباره

او هيبة قهاره

او عالفلك منشوره حيدر او دستوره

ياصاح إنصف من تخوض ابأخبار واحچي ابموده

من صاح يابا الغوث اغثني المختار من حضر عنده

غير الكسر راية بني عبد الدار او چاد اليضده

يالتريد أوصافه إنشد السيافه

انعم اعيونك

من يخبرونك

قبلة المحظوره حيدر او دستوره