ماجينه لوله المجتبه ما جينه و بمولده انهنيك و تهنينه

يا رب ندعي و كلنه انقول بجاه المبعوث المرسول

ريت الفرحه اعلينه اتطول و تحفظ هالنعمه و متزول

يا والد الزهرة و عميد العتره يا طه يا كنز العلم و الثوره

بفرحة المولد لليودك سره و انطينه من أجل الحسن انطينه

الدارك نعنينه و قلبنا ينادي قرة اعيونك بالحسن يالهادي

و سبطك البيه يتغنه طير الشادي و الأجله احنه بها الحفل غنينه

اتعنينه من عندك نريد بشاره بوليدك التزهي و يشع أنواره

و يا الما يرد خايب أبد خطاره خطارك بها الليلة قرة عينه

يا سيدي شفنه الوجود اتنور من حيكم اعلينه سني العز أزهر

و لمن سالنه الناس قالوا حيدر أصبح أبو السبط النبي هادينه

من شدة الفرحه اعتمدنه الليله الدارك تجي و للمجتبه انغني له

و أجمل تهاني بمولده نهدي له وبذكره يسهر كل وكَت نادينه

يا سيدي من الأزل عاهدناكم نحيى و نموت آخره و دنيه وياكم

و هيهات يا سيد البشر ننساكم و الينسه طه من انين يآخذ دينه

هالليله يا سيد البشر نتمنه وياك بفراح الحسن نتهنه

ومن نشم عطرك نشم ريح الجنه و جنة غرامك بالعشق تحيينه

بكاس الولايه ايزيد نشرب كوثر من ايدك الميمونه يوم المحشر

و المؤمن بهاي الولاده استبشر و أعلن مسراته بحسب تمكينه

يا سيدي يا مشعل الحريه و بحر الكرم يا فخر الانسانيه

انطينه من أجل الحسن عيديه و ارضينه يا خير البشر ارضينه

عيديه منك نطلب و نتوسل الهاي المشاعر باللطف تتقبل

و الينتظر ألطافك و يتأمل ما ترضه يرجع فارغه جفينه

لجل الحسن نرجوك يا سيدنا آخره و دنيه بطاعتك تسعدنه

و تآخذ بساعات المهمة بيدنه و تهدينه لدروب العدل تهدينه