دهري كلما جار انخاك... يالحسن واشعر بحماك

تعبر حدود الايام ...تشفي روحي من الالام

عيني قبل لساني تحجي عن حبيبي بلا كتمان

مو قلت سئلوني عنك بيك فضحتني الاجفان

سيدي وهالدنيا لمن سدت بوجهي البيبان

وين اروح لغير بابك من قلتها مو غلطان

وبمقالي... ما اغالي ...لا ابالي... لو انلام

عقلي بيمينك ملكته قلبي بيسارك مأسور

بالرخا وبالشدة يمك يالولائك حصن وسور

وانت يالكلك شهامة تحتمي بذرعاك صدور

وبجبينك يا إمامي من الظلام يلوذ النور

إنت سيرة ...كلها غيره... للبصيرة ...نورك دام

شنهو يمنعني أحبك والمثل خالفته الراي

كلمن بعيد على عيني عالقلب مبعد يهواي

لا وحق الماتدركه بالبصر شوفة عيناي

ما اشوفك بس احسك توقف بكل شدة وياي

ما تركتني... وادركتني... وملكتني... وقلبي هام

هالحروف الابجدية صرت اقلبها بكل صوب

ياوصف يحمل بلاغه يصلح لوصف المحبوب

مشرق بأفق المحبة يا شمس وبليه غروب

قلبي شمع وانت تدري من الطبيعي الشمع يذوب

سر خصالك ...من كمالك... يالحلالك ...هالإلهام

شلون اعبر عن محبتك بالمعاني العقل يحير

من اللغات احساسي اكبر واغرق بموج التفكير

مرة بأدوار المحبة للكلام الدور يصير

مرة لا بس بسكوتي والسكوت افضل تعبير