يوسف إخوته تتمنه موته

يوسف  إخوته…تتمنه  موته
و حسين إخوته إتخضبت …قبله بدماها

ناس  اللي عدها إنصاف…و من الجليل إتخاف…عادل حمكمها
معنه الإخوه إتقول…بالمنطق المعقول…وارد  فهمها
و  الفتنه  و التفريق…عد يوسف الصديق…تركت ألمها
طبع  الحسد  شيطان …و يفرق الإخوان…و الحب يلمها
و حسين إخوته إتشوف…عطشانه جتها إسيوف…يرويها دمها
أربع زلم و الصوت…واحد يلبي الموت…إبساحة قيمها
ولد  الصميده …رمز  العقيده
جدام  إخوها إتقدمت…ثبتت  وفاها

دور الأم إيقولون …طول الزمن مضمون …يترك أثرها
إتقرب اليصير إبعيد …إتلم الشمل و إتريد…تاخذ  أجرها
و هذا المثل يا ناس…عن طيبة أم عباس…طيلة  عمرها
و  أم البنين إسباع…رضعتهم بأطباع…تروي  خبرها
طاعتها للمعصوم …خلت ذكرها إيدوم…و نحجي  إبفخرها
رادت  توفي الدين …شجرة وفه و لحسين …و إنطت  ثمرها
والأم نعدها…قدوه  إبمجدها
نِعم  الأم و ما قصرت و الله برباها

يوسف نبي و إشلون …موته إعله خوته إيهون…إنظر  حسدها
من  دبته للبير…تتمنه مثله إتصير…ظهرت  حقدها
و  ما  عنده كل إذنوب…عد والده محبوب…و مأمنه عدها
و حسين إخوته إدروس…للغيره و الناموس…لمن نعدها
و بإسمه ما نادوه…و بخطوه ما سبقوه…إتوده و يودها
إخوة وفه و إيمان …و طف كربله البرهان…يذكر  مجدها
وصاها أبوها…إبطاعة  أخوها
إبخدمة  وليها إتشرفت …بلغت  علاها

يوم  الوداع  الصار…و ضعن الإخو من سار…من المدينه
أمهم  تصيح اليوم…يوم الوفه المعلوم…لليوفي دينه
صاحوا  يالتنادين…يا  أمنه شتردين …أمرج  علينه
لحسين إخونه إجنود…و الخبر ليش إيعود …وكت الوفينه
خدام  أبو السجاد…نفدي له كلما راد …عزنه  وولينه
يوم الحرب لو دار …توصل لج الأخبار…و إفتخري  بينه
إنطت  عهدها …ووفت  وعدها
بأشرف وسام إتوسمت…نالت  رضاها

صاحت يضي دنياي…يوليدي يا وفاي…و نور  القبيله
هاي إختك الوياك…و إمسلمه بيمناك…هاي  العقيله
من  يطلع  المضعون…سفرتكم إيقولون …سفره طويله
لمن أظل بالدار…أتنطر الأخبار…دم دمع  أسيله
جاوبها  راعي الزود…حامي الضعن موجود …و آنه  كفيله
آنه إبنج العباس…بالشده رفعت راس…و عندي  الفضيله
و إجفوف إيديه…تشهد  عليه
و لو جان عيني إتصوبت …يكبر  ضواها