يبويه إلمن تركتوني عليلة لا تخلوني

يبويه إلمن تركتوني…عليلة لا تخلوني

ثغر جرحي نطق بغيابك اتكلم…اشيصبرني اعله فقدك بويه شتعلم
بوية و كل ضلع بغيابك اتهشم…يوالد فاطمة ابهم فاطمة تعلم
بوحشة داري عفتوني…عليلة لا تخلوني

أعيش اشلون بعدك بويه علّمني…وعت عيني اعله وجهك من زغر سني
عمت عين الزمان الغيبك عني…جنت أقرب إلي يا والدي مني
عجب يا بوية تنسوني…عليلة لا تخلوني

يبو الأكبر مصابك مولد آهاتي…و عدد أيام هجرك عمره دمعاتي
أناجيك بسكوتي و يا معاناتي…صفت بعدك يبويه أنفاسي شماتي
أعيش اشلون دلوني…عليلة لا تخلوني

عشت بعدك يتيمه و موتي أتمنه…و حمام الدوح مني اتعلم الونه
يا كسر الخواطر بيش أجبرنه…و مسمار الهجر يطعني جم طعنه
صحت لا لا تهضموني…عليلة لا تخلوني

جرح آنا و غيابك بويه لجماتي…تمر حسبه و تردني الحزني حسباتي
صرت كلمه على شفة معاناتي…تقراني بكثر ما تجري دمعاتي
أنادي اوياكم اخذوني…عليلة لا تخلوني