من سدوا الماي عالفاطميه

من سدوا الماي عالفاطميه…..وكل مرضعه تصيح يبني شبيديّه
گلب الرضيع من العطش وجّر  لهيبه
والله شمصيبه… تصيح الغريبه

آه  يا نيران حسرة گلب عبدالله  حرگتني
ذوّبت شحمة عيوني وأثرت بيه وعمتني
شلون حسرة گلب يابس حرگت دمي  ويبّستني
لو چان إلي قوة گلب…. واعصاب قوة من الصلب
چا  جرن  بدموعي التصب…. وبونين الطفل  فتني
بالمهد ويلوح……. حيرني أمره
والطفل لومات…… گلبي شيصبره
ما  يقبل النوم ويون… ونّه عجيبه
والله شمصيبه تصيح الغريبه

جودي ياعيون الرباب وخلي عبراتچ يجودن
والگلوب السايلات النوح خليهن  يعودن
نوحن  على  الطفل نوحن لا تسترن لا  تهودن
والگلب لو وشنّمه…. تبگى العيون  مورّمه
بدال الدمع تنزف دمه…. والهموم  شمايزودن
يتهدم الحيل…… وإنهدم حيلي
ومن ثگل الهموم……مانمت ليلي
عالگبل  ميحانه إنفطم…. وفطمته  النيبه
والله شمصيبه… تصيح الغريبه

هالله هالله شلون شح الماي بخيام ابو اليمه
عمت عيني على الرضيع المن ظماه إحترگ  دمه
وأمه  متدوهنه وكل ساع تنحني فوگه وتشمه
وتصيح يا نعم المضن…. دگات گلبك فترن
لا ماي عندي لا لبن… والعطش ناره مضرمه
وشبيدي عالماي….. عبدالله يبني
من  شفتك تلوج…… گلبي لسبني
ولا قطره منه بالخيم…. يحصل وأجيبه
والله شمصيبه…. تصيح  الغريبه

إنضمت الموقف الحره وشافت الحاله خطيره
تناولت  جود  الكفلها وإعتنت له مستجيره
واتعثر عالمصيبه واتعكز  عالبصيره
صاحت بعين الغانمه…. بالخيم حاله مألمه
أطفال  ماردها  الظمه…. والمراضع  مستحيره
رب  الوفه  صاح…..والصيحه خطره
لا يهمچ الماي… شما يصعب أمره
لو  صاير بسابع سمه… بالسيف أجيبه
والله شمصيبه…. تصيح  الغريبه

حنى ظلوع الوفه لزينب واستلم جوده  وتچنه
خفگت  الرايه على راسه وخفگت گلوب  المحنه
حمل وتسيطر بشاطي العلگمي وما شرب منه
هيهات  يتهنى بشرب….. ويتروه من ماي  العذب
والطفل  گلبه ملتهب….. وبالرضاعه ما  تهنى
مشرف على الموت… وكل چاره ماله
والمرضعه تلوج ….وتبچي على  حاله
والطفل شيفيده الثدي… لو جف  حليبه
والله شمصيبه…. تصيح  الغريبه

وظلت عيون العقيله شابحه لخيمة  وليها
وتصد  لأطفال ابو اليمه لا نفس لا روح  بيها
والرباب  تصوط عنها وترجع وتصفج بديها
مايوسه  ما عدها أمل….. حست بعباس  إنچتل
وعبدالله يبراله الأجل… والمرامي  مصوبيها
عالنبل والجان… معرض وريده
من شال الحسين… عبدالله بيده
وينتظر  نبلة حرمله… بنحره  تصيبه
والله شمصيبه… تصيح الغريبه

طوگ من نور الشهاده للرضيع  مفصليله
ومن أجور التضحيات بدم وريده  مسجليله
مرضعه بدار الحضانه بالجنان معينيله
سبحان رب الأكرمه…. لهذا الرضيع وسلمه
بيد  الشفيعه فاطمة….. وللجنان  تزينيله
وحفلة إستقبال… ينصب له  عمه
وبدموع  العيون… ينغسل  دمه
وشاهدوا سكان الخلد…. حاله غريبه
والله شمصيبه… تصيح الغريبه