معصومه تنحب

معصومه تنحب …. لو هذي زينب
نفس المحن شافت …. لجن يا لوعه أصعب

سبحانه  الذي لا صاحبه وياه …. خلق معصومه رحمه و للرضه  ترعاه
مثال  أمها  خديجه يم رسول الله …. و مثال الزهره يم حيدر عظيم  الجاه
لاجن  خاوته  ابدمع الحزن و الآه …. خوة زينب و ما عاشت  ابفرقاه
و      بفقد      اخوها      ….     اشقد      ألموها
مثل  الإخوها  ابكربله بالدم تخطب…نفس المحن شافت لجن يا لوعه  أصعب

معصومه  ابزمنها و شدة أحكامه …. زينب ثانيه و مدمعها  يتهامه
هي  للرضه اتظل زينب أيامه …. و هو احسينها اللي تحمل  آلامه
و  قوس اللي رمه زينب امن اسهامه …. ابقلب معصومه مثل اسهامه تترامه
و     گوس     المرامي     ….     ظل     دمعه     هامي
يبجي  ابسبب رمياته عالقلب التعذب…نفس المحن شافت لجن يا لوعه  أصعب

معصومه تورثت فقد إخوها من انين …. من عمتها لا شك بمصاب  احسين
هاي المحنه جددها و نقلها البين …. صاحت وين أخويه الرضه عني وين
لاجنها  اطلعت  بالرحله عن تعيين …. و بأرض الغرب غمضت جفن  العين
ابهاي المصيبه …. ماتت غريبه
لاجنها  مو منفيه مو عنوه تغرب…نفس المحن شافت لجن يا لوعه  أصعب

المحن تتشابه ابكل دمعه كل ونه …. لاجن تختلف باللوعه كل محنه
زينب  من  إخوها قطعت الظنه …. ابحين اللي الشمر للمصرع  اتعنه
و  اخت الرضه هم ظنها انقطع منه …. و فرق من حيث لاعت بالبعد  عنه
مو  يمه جانت …. لوعتها  هانت
اوياهي اللي جانت بالمذبح أقرب…نفس المحن شافت لجن يا لوعه  أصعب

يحق للفاطميه أعني معصومه …. عله امصاب الرضه لو تبقه مهمومه
وسافه من إخوها الغالي محرومه …. و ابفقده دموع اللوعه  مسجومه
يعين الله قلب زينب المظلومه …. جم مفقود عدها اموسد  الحومه
بارينه    شاهد    ….    مو   عدها   واحد
جم جثه وسط الحومه جم راس التنصب…نفس المحن شافت لجن يا لوعه أصعب

لو هاللوعه فوقاها ألف لوعه …. لو أحزان هاي الدنيه  مجموعه
جفن معصومه لو تنزف دمه ادموعه …. جفنها مو جفن زينب  ابينبوعه
فلا  شافت إخوها و جثته مصروعه …. و عله الغبره ذبيح انطحنت  اضلوعه
حزن العقيله …. ما صح مثيله
أعظم حزينه و الصبر منها تعجب…نفس المحن شافت لجن يا لوعه  أصعب