ليلى تنادي يا مظلوم

ليلى  تنادي يا مظلوم…. گلي يا شبل  حيدر
بظلع أمك أحلفنك…. عليمن وجهك  تغير

يحسين اللسب گلبي… وحالي تغير لحالك
ليش  بأمرك إحتاريت… وليش لزمت  دلالك
وبروحك اشوف تجود…. يابن المصطفى  شمالك
منهو  الوگع  بين الخيل…. گلي وإندهش  بالك
يا  عطشان عالتربان.. طاح إبني علي الأكبر

يحسين الولد مريود… شمعه لوالده وأمه
وهالشمعه  يعلگوها… وگت الشده والهمه
چني الشمعه طفوها… وعيوني غدت  ظلمه
وچني وليدي مني راح…. وچنه تخضب بدمه
يا  عطشان عالتربان… طاح إبني علي  الأكبر

تدريني  إشكثر باريت…. وشگد تعبت  برباه
ومن ثدي الوفه رضعته…. دمي وإنمزج بدماه
ذابت  شحمة عيوني…. من جور السهر  وياه
چن  سلمته بيد الموت.. وچن سهم المنيه  رماه
ياعطشان عالتربان… طاح إبني علي  الأكبر

إلك ضرب المهد مانام…. بگد ماتوسد بحجري
وحدر ضلوعي ضحيته… وعليه إنكسر  ظهري
ردته  تچويتي للسيف…. لو دهري بعكس  دهري
ربيته  وحسبت حساب… ينزل جثتي  بگبري
ياعطشان عالتربان… طاح إبني علي  الأكبر

عيني اللي سهرت وياه…. وماغمضت ولا  ليله
من شد للمعاره وراح….. صارت شمعة تضويله
تمنيت الرماح تصير….. ورود ولبني تزهيله
وحدود  الصوارم كون…. اغصان وچن  تفييله
ياعطشان عالتربان… طاح إبني علي  الأكبر

چني  فاجده وليدي… وچني تگبعت  بالهم
وچن بيه إنگطع يحسين … وبعد الشمل ما  يلتم
وچن چوچب سعود يغيب… وچن راسي خضيب بدم
وچني  بشمعتك تطفي… وچن بيتي التهدم
گلبي  من حدر للكون… فگد روحه  أنشرته
وروحي  اللي تلفتها عليك…. رداني وبيها  حزمته
بسم  الله  يابو السجاد…. من ودعني  حصنته
أمري وأمرك المحتوم… بيد الباري سلمته