لو ردنه الظلم ينزاح

لو ردنه الظلم ينزاح…نبذل للعقيدة  أرواح
كرامتنه…إبشهادتنه…نبذل للعقيدة  أرواح

إسمع لو ردت تسأل من صرح بهذا الراي
أحجي بالدليل إوياك إنجانك للحجي  شراي
آنه إوياك بالموقف لو إنت صدق وياي
ابهذا الوصف ما عدنه صاحب معتقد  وفاي
موج  من الفتن و أرياح…و بالمركب ألف  ملاح
الطمع عدنه…إشيوحدنه…نبذل للعقيدة  أرواح

تصريح الشهيد حسين هذا و إسمع  إشصرح
قال الموقف الثابت إبوكت العسر يتوضح
و  لو  صار الشرف ميزان الدم المنحر  اليرجح
و  قال اليبخل إبدمه قائد أمه ما  يصلح
و  اليبجي إبدمع تمساح…ما يقدر يشيل  إسلاح
وواجبنه  …يطالبنه…نبذل للعقيدة  أرواح

حسين  إبضعنه سار إبليل و بهذا المسير  إشراد
و يعرف موقف الأمه واعي و دارس  الأبعاد
حجه  تنحسب ضده من إيرجع  الوفاد
ضمن الواجب الشرعي لازم يبدل  إستعداد
و بهذا الهدف من راح…ما رايح يدور  أرباح
نوفي الديّن …صاح حسين…نبذل للعقيدة أرواح

رفت  رايه إلك يحسين و كلها إنتكست  الرايات
و للحق إرتفع صوتك لمن خمدت  الأصوات
للذل  ما أمد جفي و أخضع للظلم  هيهات
قالوا  متت و إبموتك يحسين إحتيت  أموات
راسك  عالرمح مصباح…يهدي الأمه  للإصلاح
العرف  صبرك…درس فكرك…نبذل للعقيدة  أرواح

ويه الظلم و الظلام يشهد موقفه  لليوم
إنت  أول بطل يحسين للأمه طرح مفهوم
لا  بد يفضح الظالم دم الينذبح  مظلوم
من  صحت الظلم هيهات تكبر سلطته و  إتدوم
جم منصب و كرسي الطاح…صوتك للعدل من صاح
دربنه  إبعيد…هدفنه  إنريد…نبذل للعقيدة  أرواح

لو  من نهضتك يحسين ناخذ فكر  نهضتنه
جا  ما عشنه بالذله و لا طولت  غربتنه
لكن نحجي ويا من و من يستمع شكوتنه
و  للي بالترف عايش ما يشعر  إبمحنتنه
إيقولون الصبر مفتاح…و سر الشهم ما  ينباح
عشنه  إسنين  …متغربين…نبذل للعقيدة  أرواح