لا تسافر لا تهاجر مو حلو كسر الخواطر

لا تسافر لا تهاجر…مو حلو كسر  الخواطر
لا تسافر لا تهاجر…راح أظل جم ذوب أناطر
لوين  إتروح…تريد  اروح…إخذ روحي و لا  تهاجر

عليلتكم و انا الطفله خطف لوني الجسم  ناحل
فلا  ميته  ولا عدله مثل وردة غصن ذابل
يبويه الورده ما تذبل إذا ما تقطع  المنهل
و إذا عنها العذب يرحل العمر ويه العذب  راحل
عطشتني…  و ذبلتني… وبوداعك  عذبتني
خلها  خلها …لا تذلها…روحي محتاره  بعللها
عليك إتنوح …تريد اروح…إخذ روحي و لا  تهاجر

إبلطف  وجهك أمل عندي يصبرني و  يمنيني
و إذا تبعد أظل وحدي و تذبل كل  رياحيني
يمن بيك الجرح هايد بديلك قلبي ما رايد
و بعد ما أدري يالوالد تسلني لو تسليني
فكري  سارح… مني رايح…ثغري يضحك… دمعي سافح
عززتني …دللتني…عالحزن ما عودتني…يا سبب تالي إهضمتني
القلب مجروح…تريد اروح…إخذ روحي و لا تهاجر

إعله عبدالله الجفن فجر الدمع لاجن جمر يهمي
طلب  عندي إذا تقدر الطفل خله يظل  يضمي
و  رقيه لا توديها يبويه يمي  خليها
تواسيني و أواسيها أصد همها و تصد همي
الشوفة إختي … يا فرحتي…و لو خذتها يا حسرتي
مو بديه إتعز عليه…عشنه يا بويه  سويه
مو بديه إتعز عليه…صعبه لو راحت  رقيه
الدمع  مسفوح…تريد اروح…إخذ روحي و لا  تهاجر

العقل  سارح على الوادي ابجفن عيني قهر  يشبح
يكدرني صده الحادي إبضعاينكم إذا طوح
جنت  متنوسه إبجالك الرحيل إشلون إجه اببالك
قبل ما يبدي ترحالك تبضع جبدي و  إتجرح
بيش أصابر…بيش أكابر…إنت يمي …و قلبي شاجر
لوعتني …لا تفتني…راح أموتن لو عفتني
لوعتني …لا تفتني…و شيضرك لو  خذتني
العتب  مسموح…تريد اروح…إخذ روحي و لا  تهاجر

لون طوح ضعن هجرك سحب همي عليّ  تلتم
أريدن من بعض صبرك يصبرني اعله نار  الهم
دليلي  نارك و ناري إبدويهن حرقن أكتاري
بدت توحش عليّ داري و أحس وجه الوكت عتم
عالأصيله …مو قليله…هم فرقتك هم  عليله
آنه  أودك…و أرد أنشدك…إشلون أصبر روحي  بعدك
آنه  أودك…و أرد أنشدك…لو رحت بعدي إشيردك
يوارث  نوح…تريد  اروح…إخذ روحي و لا تهاجر