كلمة مني تختصر كل الروايه

كلمة   مني   تختصر   كل  الروايه…باجر  احنه  ننذبح  و  انتو   سبايه

هذي   آخر  ليلة  آنا  اوياج  يختي…و  الذي  خافي  اتشوفينه   ابنظرتي
باجر   اتشوفين   بعيونج   ذبحتي…من  أروحن  سامحيني  و  ابري   ذمتي
حكمة  الله  استوجبت  هاي  النهايه…باجر  احنه  ننذبح  و انتو سبايه

يختي  غطي  ابجفج  اعيون  اليتامه…لا  يشوفون اشحصل لي من  ظلامه
راسي يبقه اعله الرمح و بلا عمامه…و الخيول اعله الجسم تطحن عظامه
هذي   يا  زينب  تره  بس  البدايه…باجر  احنه  ننذبح  و  انتو   سبايه

يختي  باجر  من  عله  التل  تنظريني…لا  تأشري  لي  و  تزيدي لي  ونيني
ما   أجيلج   آنا   كون  انتي  التجيني…لو  وصلتي  لي  بعباتج   ظلليني
تنظرينه   ابهالشمس  كلنه  ضحايه…باجر  احنه  ننذبح  و  انتو  سبايه

لو  وصلتوا  للذي  اعله  النهر  واقع…لا  تلجمونه  و  تقلبون  المواجع
لا  تروحون  و  تكشفوا  له  المقانع…لا  يشوف  ابخدكم  آثار  الأصابع
إلي  شافه  من  العتب  بيه  الكفايه…باجر  احنه  ننذبح  و  انتو  سبايه