عشق يظهر يبو الأكبر

عشق يظهر يبو الأكبر هتف منحر  محبينك
هذوله إحنه مثل عابس يسمونه  مجانينك

قواميس  العشق  كلها فلا قدرت  تفسرنه
و  حته إحنه إويه قصتنه إشنوصفها  تحيرنه
عشق  قيس و عشق ليله سألناه و  تعذرنه
عشق عابس فقط هو القدر يقنع  ضمايرنه
و  لو حته الجره إبعابس قليل و يكبر إبعينك
هذوله إحنه مثل عابس يسمونه  مجانينك

إذا عابس نزع درعه لجل عشقك  يمحبوبه
مهج  لجلك نزعناها جثثنه إبدمها  مخضوبه
إذا  حر واحد إبطفك إجاك إبدمعه مسجوبه
ألف  حر  هسه متعني يقلك سيدي  التوبه
نقدم الروح يالغالي نذر لتراب  رجلينك
هذوله إحنه مثل عابس يسمونه  مجانينك

زليخه إنجنت إبيوسف حرام إرتكبت  إبعشقه
و أجر ناخذ على حبنه القميص امن القُبل شقه
إذا  يعقوب ظل عايش تحمل لوعت الفرقه
نموت إحنه فلا نقدر نناطر ساعة  الملقه
عجاف  إويانه ما صارت سنابل زاهيه  إسنينك
هذوله إحنه مثل عابس يسمونه  مجانينك

تعال  و  إنت مو مبعد تعال و عاين  أحبابك
نواظرنه شمع خلصت دمع يتجاره  لمصابك
فدائك إحنه ما قلنه فداء إنقول  لترابك
فضل منك تخلينه نجيك و نوقف  إببابك
الصلاه للباري ما تمت إذا ما نسجد  الطينك
هذوله إحنه مثل عابس يسمونه  مجانينك

نحبك يا من إبحبك زرعنه إبكل شبر آيه
مشينه  إبدربك  و نعرف طريقك غاية  الغايه
إلك  نبجي إلك نلطم إلك نتعنه  مشايه
يطيح إبهالدرب دمنه لجن ما طاحت  الرايه
يمن  من الوريد أقرب نسألك إبعدت  وينك
هذوله إحنه مثل عابس يسمونه  مجانينك

قسم  بالما ترك جوده ترك عالمشرعه  إجفوفه
قسم  بالخلتك عاري مشت مسبيه  مجتوفه
نعوف  العالم بأسره طريق الخدمه منعوفه
نطوفك يا من إبقبرك عرش رب السمه  إنطوفه
يسارك جنة المأوه تجي الفردوس بيمينك
هذوله إحنه مثل عابس يسمونه  مجانينك