سلم إغله الغالي

سلم إعله الغالي …سلم إعله  الغالي
ياللي  تروح الكربله …سلم إعله  الغالي

دمعة الملهوف جمره و شوفتك  تطفيها
أنثر  إجروحي  قصايد و الزمن  يرويها
كلمه من أحجيها يمك ما بعد  أحجيها
ما  تسع  عشقين روحي عشقك  إيكفيها
يا عشق يحلالي… يا عشق يحلالي
جفك  يطيب خاطري… يا عشق  يحلالي

من  يعتني  الشوق يمك أسرع  بخطواتي
و  أزرع  إبدربك خواطر و المطر  دمعاتي
أوصل إبكلمة أحبك أنسه كل  كلماتي
و  أقعد  ببابك يتيم و تنعرض  حاجاتي
إنت إنت الوالي…إنت إنت الوالي
حاشاك  تكسر  خاطري…إنت إنت  الوالي

ونت المجروح شكو الله يعلم بيها
نظرت  العشطان  دمعه و النهر ناسيها
من  تموت أحلامي سكته و الجرح يجيها
من  تصير الدنيه شامت يا عتب  ياذيها
خايف  من إخيالي…خايف من  إخيالي
مرعوب يم بابك صحت …خايف من إخيالي

آنه  شفت الدنيه كلها أصغر من  إبهامك
و  آنه شفت الناس تنصه و ترتفع  خدامك
و أدري حاجات الخلايق تنعرض  قدامك
حاجتي  عندك يتيمه و قبلت  أقدامك
و الحزن يبرالي …و الحزن يبرالي
أعثر  و أصد الحضرتك و الحزن  يبرالي

اليريد الدنيه خله ياخذ اللي يريده
و اليريد حسين يصبر عالظلم و إعبيده
خل يخلي الجمره بيده لا يذبها من إيده
و  اليطول  عمره بالذل العمر  شيفيده
ما يدرو ببالي…ما يدور ببالي
آنه  عدا  موت الشرف …ما يدور ببالي

آنه  حبيتك  لأني ما شفت لك من  بديل
و الخسر حبك نقله لا يدور لك بديل
آنه ممكن أنسه روحي و أنسه إسمك  مستحيل
لو يميل الكون بيه أبقه ثابت ما أميل
ما  سكن دلالي…ما سكن دلالي
و  الله غير أهل العبه … ما سكن  دلالي