زينب تعنت للمعاره تنادي يحسين

زينب  تعنت للمعاره تنادي يحسين…هالنايبه  منين
حرمه وغريبه بكربله والدهر  سابيني

لفت زينب للمعاره وتتعكز  عالرزيه
شافت شبول الهواشم والأنصار على  الوطيه
مغسله بدم الشهاده بچفنه بذاري  الحميه
وگفت الحره محيره ….. صاحت ومدمعها جرى
يالنايمين على الثرى …. عسن نومتكم  هنيه
إنتوا  رضيتوا بالشهاده وإحنه راضين…هالنايبه  منين
باليسر وانه انطر حرمكم جهد  تمكيني

حنت و ونت وصاحت يخوتي دهري ولاني
من  رماكم على الغبره بولية أعداكم  رماني
وصابني بسهم الشماته وفگس عيوني  وعماني
وياكم  الشوف  انفگد ….. شتحمل و شصبر  بعد
گلبي تگطع وانمرد …. والگطع گلبي زماني
وحنه  بمخاليب  اليسر وانتم مطاعين…هالنايبه  منين
ومنين  ما صد النوايب سهم  ترميني

مخدره معشت بحياتي ولا غرب شافت خيالي
ياهلي  وظلال  بيتي سيوف ورماح  العوالي
كربلا الهدمت بيتي كربلا الكفت  ظلالي
أحا يجمرة كربلا … أحا يالمفارج هله
أحا  على المتدلله …. وراح وياكم دلالي
گلبي المدلل ميحمل جمرة النارين…هالنايبه منين
نار السبي ونار المفارگ  هالتچويني

تگوم من يم جسم تگعد يم جسم والدمع هامل
وكل  جسم خله بگلبها النار تتواگد مشاعل
لاچن الكسر ظهرها جسم مسحون  المفاصل
والسهم  نابت  بالگلب …. والدمه من اوداجه يصب
والجسم عاري على الترب …. و زور من النبل حامل
يحسين صاحت والمثلث صاب گلبين…هالنايبه منين
صواب گلبي يهون وصوابك  الماذيني

هالله هالله شلون طيحه طاحت على حسين  زينب
شبگته وشمت وريده وگامت بدمه اتخضب
جمرة العطب چبدك بيها چبد إختك تعطب
هاك  إخذ  يحسين الچبد …. شوفه اشحرگ بيه  الوجد
يبن  أمي وبگلبي تجد ….. جمر نار الخيم  تلهب
يبن  أمي هذي جثتك والراس چا وين …هالنايبه  منين
ياريت  گوم الگطعوا جسمك  مگطعيني

تبخ گلب حسين زينب چانت بدمعة حزنها
لن إجاها السوط من إيد الرجس طگها  بمتنها
وغصب  عن  جسمه اسحبوها وگطعت من حسين ظنها
وانوت على مفارگ غصب …. بركز الرماح وبالضرب
مذعوره متشوف الدرب …. ونايبات الطف  عمتها
يحسين عنك غصب للشلمات ماشين…هالنايبه منين
مدري اباريلك عيالك لو  يباروني

چني بزينب غريبه وگطعت الظنه من أهلها
وصدت  الشاطي الفرات ودمعة العين اتهملها
والتهب جمر الموادع بينها وبين الكفلها
آ يالوداع وساعته ….. بالگلب تسعر  جمرته
وزينب لخوها نادته …. العطش لعيالك  چتلها
ومخيمك دارت عليه الگوم صوبين…هالنايبه منين
نار ونهب عگب الخدر دهري يراويني