تعنت ليه للحومه

تعنت ليه للحومه …. تفسر الصخر  ونتها
طبت  گعدت گباله ….وعالخد تهل  دمعتها
تگله  عليك  ضلع أمي …. المهضومه  ومصيبتها

سولفلي يا نور العين …لا تخفي عليّ  حسين
عليّ منهل فزع صوبين
وشوف بكتر عج الخيل …وادي كربلا غيم

من  شفت الفزع يحسين… روحي هيست  بالشر
وگلبي منه مثله اليوم …. نار الخوف بيه تسعر
ما  ادري يا خويه وياي …. من هونته  المگدر

يبو  السجاد  سولفلي …گلبي خايف على أهلي
هم  وحده ابتلت مثلي
عسن  لا جيت للكوفه …ولا هل شهر  المحرم

يا  ويلي من سمعها حسين…. سالت دمعة  عيونه
يگلها  خاف اسولف لج.. وجچ ينخطف  لونه
چتلي وچتل أهل بيتي … ياختي عداي  يردونه

لابد ما تشوفيني …فوگ الثرى  مگطعيني
يختي لا تنوحيني
بالچ  عاليتامى النار …لو شبت  بالمخيم

تگله الكاتبك يحسين… من هالناس چا  وينه
يگللها يا ماي العين…. كلها إنگلبت  علينه
تگله حمل ضعونك…. وسدر للوطن بينه

يگلها  ما يخلوني …اسدر بعد  بضعوني
نيتهم                يچتلوني
ياختي ولابد تشوفين …شيبي يقطر منه  الدم

والأكبر عالأرض مطروح ….يختي عيونچ تشوفه
وجاسم  عالثرى  مرمي … بدال العرس والحوفه
وخوچ على النهر نايم ….ويمه مگطعه  چفوفه