حيدر من بعد طاها بالنص نزل تعيينه

حيدر  من بعد طاها بالنص نزل  تعيينه
صاحوا  رابع  و صحنه إنت أول  يوالينه

هذا  النص نزل يا يوم ما يستوجب  إنوضحه
مثل الشمس تبيانه و يا غيم الحجب صبحه
حق  حيدر علي الكرار من يا جانب  إنطرحه
دين  الله كمل بإسمه و بسيفه عله صرحه
تاريخ  الظلم حقه واجب لمن  إنفضحه
حيدر  تقوته  تشهد و اليشهد نزف  جرحه
دين  الله  إبعلي إتكمل…رمز العدل  يتمثل
والي إبغيره ما  نقبل
و الباري بإسم حيدر تمت  إعلينه

حبينه  علي  و حبنه ناتج عن وعي و إيمان
سيف الله علي و درعه و تشهد له الإنس و  الجان
قالوا رابع و قلنه الأول حامي  الجيران
و الرايد يحاججنه إنقدم له ألف برهان
آيات و سور تشهد نزلت عنه بالقرآن
والي و من قبل آدم حيدر نصبه  الرحمان
من يوصل علي و شانه…خل يتحاجج  إويانه
و  خل  ينطينه  برهانه
من  أول خليفه إنريد شمقدم  يراوينه

أول  مسلم  إيقولون وجه المرتضه  يكرم
حيدر  ما  كفر حته نقول أول رجل  أسلم
هو  اليعلم التأويل و بسر الفلك  يعلم
حلال المشاكل جان إسمه الله علي الأعظم
و الياخذ مجانه إيكون مثله و ما نقول  أفهم
و القال الخليفه آنه للأمه وعي إشقدم
تشهد  كتب تأليفه…لو عنه حكه  ضيفه
لو  جندل بطل  سيفه
من  يا جانب إنشاهد عالمرتضه  إمفضلينه

شوره  نفرض التعيين و إناجج  ابهالمصدر
إشروط  الوالي معروفه و لازم كلها  تتوفر
عالم متقي و عادل مو عاطفي و  يتأثر
إيجاوب من يسألونه و مو من شانه يتعذر
شجاع  و  ما يهاب الموت كون إبحرب ما  أدبر
و  كل هذا الوصف موجود عند المرتضه  حيدر
عنده إتجمعت أوصاف…إتريد اليحكم بإنصاف
ما   أدبر   علي   و   لا    خاف
أفضل  منه  ما موجود و الرابع  إمخلينه

ناس الأسلمت خدعه و ظنت تخدع  الجبار
لمن  عصت و إرتدت مو عجبه و طبعها  أشرار
ووصاها  إبعلي  الهادي و قالت يهجر المختار
لا تستغرب الحاله لمن عزلت الكرار
و لمن ظلموا الزهره حين الهجموا إعله  الدار
و باب الدار دفعوها و إنصاب الضلع  مسمار
صابوك و تيتمنه…هم السببوا  همنه
و  غربتنه و سفك  دمنه
يبغضهم  و ما يرضون بإسمك لون  نادينه

مثل  حب الوصي حيدر حب صادق فلا  شفنه
و  برغم  الفوراق دوم سر حبه  اليوالفنه
ثمن باهض محبتنه لو نفرض تكلفنه
ندفع  و بقلب واحد كل إحنه  تحالفنه
جم عاصفه المرتنه و كل غايتها تحرفنه
ما  قدرة تواجهنه و التشهد  مواقفنه
إوقفنه و النجف يشهد …و دمنه النزف  بالمرقد
عن     حبك    فلا     نرتد
أنفس  يا  علي و أموال بمحبتك  ضحينه

حقنه  ابمثل  هالليلة نلطم و الدمع  سجاب
و نقول إنصاب دين الله مو راس الصميده إنصاب
و  إنقله يبو الحسنين مو بس موحش  المحراب
قبرك يا علي موحش و بباب الضريح  إذياب
يا  من سيفك إمجرب و ما يقدر يضمه  إقراب
تدري  إبشيعتك  تنخاك مهضومه يداحي الباب
جيرانك  يحامي الجار…بين الأمل ليل  إنهار
تقصد         حضرتك         زوار
طالت  يا  علي الغربه و الحضرتك حنينه