حيدر علي يا شيعته

حيدر علي يا شيعته …غمض و سكنت  ونته
بصواب جتاله إنصاب…ليث الحرب داحي  الباب
غمض و سكنت  ونته

هالليلة  مريود  البجي يا علي هل  الدمعه
شيعة  علي عقد الوله ناعي المصاب إتسمعه
متقبعه  طلعت بالحزن والي اليتامه  إتودعه
و  غير العذاب إشتنتظر لمن أملها  إتشيعه
ناعي  الحزن من سمعته…تبجي و تنوح إتلقته
و  الدمع من دم سجاب…ليث الحرب داحي  الباب

قصدوا الدار المرتضه و صاحوا يراعي الكلفه
حته ما تبره من الألم و جرحك يا حيدر  يشفه
ما جنه نحسب يا علي مصباح وجهك يطفه
أظلمت  دنيانه و بعد ما ظن تفيد  الوسفه
يا قلب يقطع ونته…و نيران تلهب  حسرته
حسرة  إموادع و إعتاب…ليث الحرب داحي الباب

من  غسلوا جسم الولي صوت الصده  إيسمعونه
يا شيعه جرح المرتضه بهداي لتلجمونه
و برأفه لمن عاللحد يهل الوفه  إتوسدونه
يا  ريت قلبي إبلوعته وي حيدر إتدفنونه
قدري  يغيب إبغيبته …و العمر يفقد  هيبته
عقب الإبو إشلون أنهاب…ليث الحرب داحي  الباب

هالصوت  صوت أم الحزن بت حيدر  الفجعوها
هاي  اللي شافت فاطمة بالباب من دفعوها
و  إنكسر  من عدها الضلع و بلا ذنب  ظلموها
و الضلع جرحه ما نشف و بأكلف جرح  صابوها
جرح الصميده شافته…نصين جاسم  هامته
و إمصاب أشد من امصاب…ليث الحرب داحي الباب

يا ريت صاحت يا علي يومك يوالينه  إبعيد
ياليتمتنه إبغيبتك و هالمجبل إعلينه  العيد
لو  أدري يجبرني البجي و الون يبو حسين  إيفيد
ما جان أبطل ونتي و أصفق الإيد  بأيد
نعشك  يبويه إبشيلته…طلعت الروح  إبطلعته
و  العيش بعدك ما طاب…ليث الحرب داحي  الباب

وياك  ياخذني الأجل يا حيدر إتمنيته
ليل الوداع إبونتي و سيل الدمع قضيته
يا حيدر وويه الفجر محرابك  إتعنيته
من  بعد نورك يا وسف أظلم يبويه  إلقيته
حيدر  يطيح إبسجدته…خضبت بالدم  شيبته
يندب  إبحرقه  المحراب…ليث الحرب داحي  الباب