حادي المصايب مر بينه

حادي  المصايب مر بينه ….و حلت مصيبة  والينه
ما  تنطفي  هالنار …. تسعر دوم رادوها
بعد  النبي  المختار …. هاي الدار  قصدوها

حادي المصايب سار بالفاجعه اينادي
و الليله بالآهات جر حسرته  الحادي
سادس  علم ينعاه من عترة  الهادي
و ناخ الحزن وياه من مر عله الوادي
وادي  البقيع  و مأساته …. و قبر الرسول و  دمعاته
و  من السقيفه آثار …. للأحقاد  رسموها
بعد  النبي  المختار …. هاي الدار  قصدوها

نار الحقد لليوم خلوها  متوجره
شبوها  باب الدار و الشاهده الزهره
و  للطف سرت لخيام بنت الوصي الحره
و للصادق المظلوم خلوها مستعره
نار  المصيبه ابها الليله …. إسمع خبرها و  تحليله
و  البغض للكرار …. هالأحقاد  ضموها
بعد  النبي  المختار …. هاي الدار  قصدوها

بذره زرعها احسين مصدرها من  جده
رواها من ادماه يوم البقه  وحده
للشيعه  شجره اتصير جان السبط  قصده
و  ابدربه جعفر سار كبرها من  بعده
الصادق حياته ابهالبذره …. و مذهبنه ثمرة هالشجره
ما همها كل اعصار …. و الأشرار عادوها
بعد  النبي  المختار …. هاي الدار  قصدوها

مر  البقيع و شوف تاج العلم  وضعه
ونه و صده المأسات بالوادي اتسمعه
صد للقبر عيناك ما تقطع الدمعه
لا تقدر اتظل دوم لا تقدر  اتودعه
من الزياره حرمونه …. لو ردنه نبجي  منعونه
عاد  الزمان  اليوم …. و الأشرار دابوها
بعد  النبي  المختار …. هاي الدار  قصدوها

وادي البقيع اتشوف من تنظر  اقبوره
من السمه نجمات بالوادي  منثوره
تلقه المحرم آه يرويها عاشوره
و  لهل العبه نبراس شق القبر  نوره
قبر  الوفيه المعروفه …. أم الفده لخته  اجفوفه
بس لوعت المسمار …. متعمدين يخفوها
بعد  النبي  المختار …. هاي الدار  قصدوها

وصوا  هضميه  و نوح عالصادق و  لوعه
و الشيعي ما ينلام لو هلن  ادموعه
جن  و  إنس و أملاك هالليلة  مفجوعه
ونتها بأهل البيت و الونه  مسموعه
ونت  عتب ونت لوعه …. تبجي المصابه مفجوعه
اشما رادوا ايمنعون ….ميقدرون يولوها
بعد  النبي  المختار …. هاي الدار  قصدوها

سم  و  ذبح و اقيود هالعتره مر بيها
و  ابدمعه نوح و آه نذكر  مآسيها
بأولها دوم انعيش ما شفنه تاليها
يمته يكحل العين بالطلعه مهديها
طلعت فجرنه اعله اجبينه …. و راية نصرنه بيمينه
و  انقله  هذا الثار …. هاي احقوق غصبوها
بعد  النبي  المختار …. هاي الدار  قصدوها