ثقلت يا علي الونه

ثقلت يا علي الونه …نصبر نقطع الظنه
ينخاك  النفذ  صبره…و يوم الفرج ننتظره…نصبر نقطع  الظنه

يا سر الجليل و رحمته الوسعه…يا قالع الباب الما حد يقلعه
ونين البقلب ينحبس شيجرعه…و إذا يظهر نخاف الشامة  إيسمعه
إشلون  العايش إبغربه …يهجع يا علي  قلبه
دومه  إمعاشر  الحسره…و يوم الفرج ننتظره…نصبر نقطع  الظنه

يبو حسين العزيز الينشده رايه…بعد ما ظن تصح رجوة شفه  الدايه
يا وجه اليبيع إبلا ثمن مايه …و الماي الوجه ما بقت  شرايه
الصوبك  وجهي وجهته…و مايه اليوم إلك  بعته
و بس إنت إتعرف سعره…و يوم الفرج ننتظره…نصبر نقطع  الظنه

يا  من  يعتنيك التثقل إهمومه…تجليها و يرد الديرته  إبيومه
إلك  شيعه  تعيش إبغربه مهضومه…يا حيدر ذنب ما عدها مظلومه
ما تنوصف حيرتها…و ترفع إلك شكوتها
إبصوت  العتب و العبره…و يوم الفرج ننتظره…نصبر نقطع  الظنه

صبرنه و لمن ضقنه من الصبر مره…و ما نجزع لون ذبحونه ألف مره
و  لا من حبك البلقلب نتبره…يبو حسين اليضرنه إنريدك إتضره
غيرك  يا علي إشعدنه…ندبناك و حشه  إتردنه
كسرنه  إنريدك  إتجبره…و يوم الفرج ننتظره…نصبر نقطع الظنه

من حقه اليحبك يكثر إعتابه … من هضم الزمان إدموعه  سجابه
يالدارك ملاذ الفرج لحبابه…و غيرك يا علي منهو الندق  بابه
دارك  يا  علي إنعرفه …دوم الشيعتك ملفه
و  جفك للكرم سفره…و يوم الفرج ننتظره…نصبر نقطع  الظنه

غصب  عنك تبعدنه و تشتتنه…طالت يا علي اعله الوطن  غربتنه
يالحبك أملنه و إنت غايتنه …يا يوم النعود و ترف  رايتنه
إرقاب  إنقدم  إنذوره…و قبرك نقصد  إنزوره
نطوف و نبجي بالحضره…و يوم الفرج ننتظره…نصبر نقطع  الظنه