أبيات أبوذيّه في رثاء الإمام الكاظم عليه السلام

على الكاظم أنوح بليل و  نهار
و اصب الدمع شبه السيل  ونهار
جسم باب الحوايج ذاب ونهار
مسجون  و  جرع جاس المنية

امصابك  نحل اعظامي ورضها
أسلي  اشلون أنا روحي  ورضها
بجه الحزنك سمه العليه ورضها
الهضم  سجنك  يا فخر  الطالبية

يا من يالكاظم البسمك لاذ يامن
القلوب  اعليك  يا مسموم يامن
ما خاب التمسك بيك  يامن
صرت  باب الحوايج  للبرية

سره ضعن الغرب بينه  ولاوين
بعد  لا  نوح ينفعنه  ولاوين
وين انروح يالكاظم  ولاوين
ننطي الوجه يا روح  الزجية

السائل  سأل شنهو الصار وجره
و  ليش أمست مهجنه ابنار  وجره
قلت كاظم الغيظ انفقد وجره
مدامعنه و فجعنه ابها  الزريه

بإسم باب الحوائج حين  سموك
ابوسام الشرف أهل الشرف  سموك
وسف قوم اغدر بالسجن  سموك
و بقه فوق الجسر نعشك  رميه

جم مخلص حمل صبره و لامال
يتاني  و ما ضعف قلبه و لا  مال
الشيعه  إجت عالموعد و لا  مال
تحظه  إبشوفتك يبن  الزجيه

يمن جدك الدرب العدل منصاح
الزمن وي شيعتك لليوم  منصاح
ناعييك شعب جم قلب  منصاح
إنجتل مسموم إمام الرافضية

جم  بيده  قطع جذمي و  بيداي
و أكف الدمع بجروحي و  بيداي
ضريحك مرهم العله و  بيداي
طبيب  إنت يبو إبراهيم  إليه

ابعسر  مريت  بالدنيه و بيسار
ابيمين أشقف سهم دهري و  بيسار
إجيت  أسري ابجرح قلبي و  بيسار
بالكاظم  أعزي  الكاظمية