عبدالله يا ضي عيناي

عبدالله  يا ضي عيناي …. دمك جره ابدال  الماي
لو أدري دمعي يرويك …. للنبله ما جنت  أنطيك
عبدالله  يا ضي عيناي …. دمك جره ابدال  الماي

حزينه  يا بعد روحي إلك دمع الجفن  هملان
حزينه و الحزن وياي هم مثلي إلك  حزنان
غصن  و اسقيتك ابدمعي أشوفك يا ترف ذبلان
احسبت  كل حسبه ما ظنيت تموت ابكربله  عطشان
لو أدري من إيدي اتروح …. ضميتك ابروح الروح
و  أفتح دليلي و أخفيك …. للنبله ما جنت  أنطيك
عبدالله  يا ضي  عيناي

يا  عبدالله انقطع نحرك تمنيت انقطع نحري
مثل جمرة عطش قلبك ابدليلي يستعر جمري
مو  بس آنه يوليدي جره دمعي ابحجر  صبري
حته الدمع هم اعليك يبجي دمعتي  تجري
بالطف  إلك يا مذبوح …. ناحت حمامات  الدوح
لو دمعي يقدر يسقيك …. للنبله ما جنت  أنطيك

ابوريدك  نفذت النبله رمت قلبي ابنبال  الهم
عوض  ما ترتوي بالماي ترويت ابنجيع  الدم
اطش  دمعي ابسمه انجومك النجم منثور ما  يلتم
يا من حته الألم ينبي عليك ابكربله اتألم
و آنه ابغدير العبرات …. أخمد جحيم  الحسرات
لو  أدري بالروح أفديك …. للنبله ما جنت  أنطيك

اشلون  أشرب  نمير الماي تسجر بالعطش  جبدك
يعبدالله  بعد هيهات اتهنه ابعذب  بعدك
القطع  نحرك يبعد أهلي اشيجاوب بالحشر  جدك
رماك  و خله من عقبك ينوحن أمك و  مهدك
يوليدي  صابوا  قلبين …. قلب أمك و قلب  حسين
لو أدري خصمك يرميك …. للنبله ما جنت  أنطيك

أحن و امهامل ادموعي يتسابق يبني ويه  إدماك
يمحزوز النحر وينك دهتني نايبة فرقاك
يريت ابقبرك أتوسد و أنام ابحفرتك  وياك
و  لا متخضب إقبالي من دم الوريد ألقاك
دمك  عصر نجم الليل …. خلاها بدموعي  اتسيل
لو  أدري حالك يرضيك …. للنبله ما جنت  أنطيك

أصد اعله المهد خالي و أهيم ابعالم أحزاني
قبل  موتك يعبدالله يريت الناعي  ينعاني
حرت  جم  لوعه جم محنه دليلي إخلافك  ايعاني
زماني  الصوبك يبني ابرمي إسهامه تولاني
عبدالله  يبني اشمطلوب …. من وريدك  مخضوب
لو أدري موتك يلفيك …. للنبله ما جنت  أنطيك