دَمعة فاطمه ظلت جريه يَم خير البريه

ولفﮕده يون حامي الحميه

من بُرج السِمَه جبريل صوته صاح بدموع النوايب

نادى راح ابو الزهره ووسف لو راح تتوالى المُصايب

وَحْشَه الدنيه لاطَرَّة ضُوى لْمِصْبَاح بَدْر الرحمه غايب

وبدار الرساله صوت الهَم تِعاله

ينحب حيدر لنوح الزﭼيه

عين بْعِيْن هَاي الليله سﭽابه والحاله رهيبه

يَم سَيْد الرِسِل ملتمه احبابه محبوب وحبيبه

بِنْتَه الزهره بيها الجمره لهابه من حَر المُصيبه

وحيدر تجري عينه ومايهجع ونينه

من فﮕد النبي روحه شجيه

يَم جسم النبي حيدر يِوِن وينوح والونَّه ثجيله

غَسَل جِسْم ابو الزهره بﮕلب مجروح والمدمع يسيله

ﭼَفَن سَيد الأُمَّه وذهيله الروح ومِتْﮕَطِّع دليله

أرض الله وسماها محزونه عله طاها

وفَﮕْد المصطفى أعظم رزيه

من غاب النبي وحيدر دِفن جسمه هالأُمَّه شِدِهاها

رَدَتْ جاهليه وخانت الأُمَّه مِن تِبْعَت هواها

نكرت كل عهد .. صَارت بلا ذِمَّه وطاغيها غِوَاها

وِتْبَدَل وَضِعْها مِن دافِع طُمعها

خانت طاها مِن نكرت وصيه

مجتمعه بطمعها لْتِدِعي أصحاب أصحاب السقيفه

أولهم نِكَر وارْتَدْ عَلى الأعقاب وصار الشر حليفه

بالحيله غِدَر شَرْع النبي ولِكتاب وتْنَصَبْ خليفه

ولْخانت نبيها شلتترجى بيها

بعد الهادي رجعَت جاهليه

وباب ليدخله بإذن العرش جبريل طاغيهم دفعها

شَبِ الناراْبَّابْ مَهْبَط التنزيل ومستودع شرعها

والزهره ورى الباب ودمعها يسيل وِتْهَشَّم ضِلِعْها

وتصيح الحﮕيني عالغبره جنيني

يافضه وﮔع محسن رميه

وبحبل الغدر ﮔادوا علي الكرار ماعِدهُم مُرُوَّه

طِلعت فاطمه وتحمل ألم بِسمار ماظل بيها ﮔُوَّه

رجِع ﮔُنفُذ وسوطه عله الزﭼيه صار بِالمَتْنِ يْتِلَوَّه

بت سَيد رُسلها منهو ليﮕْصِد إلها

من طاحت تون ونَّه خفيه