آنه وْيَه الجروح نجيك مشايه وْضَعن امْخَدراتك دمعي حدايه

مسابﮓ للطفوف آنه وجرح عاشر أركض لك ركض بين الدمع حاير

أتعنى مثل مايعتني جابر يم ﮔبرك ومثله يعتلي بﭽايه

أجي لﮕبرك ضعن بالنايحه مسلَّب بعد ضيم اليسر يَمَّك رجع ينحب

أجيك وأذكر اشلون ارْجَعت زينب مِن بعد اليُسُر وبهمها عنايه

أجي مكسور واحمل لوعة سكينه وصدى صوت اعتله وين الﮕمر وينه

أجي بحسرة ﮔلبها وحرﮔة ونينه من صاحت لبو النوماس شكايه

أطب لكربله وَيَّه الثكالى بنوح بنحب رمله أجي بشموع كلها جروح

ورباب اوياهاْ اْوِن للي بسهم مذبوح طفلها وين وحﮕها تنوح .. أُمَّايه

أفزَع ويَّه ليلى واعتني الأكبر ومثلها بالمشي من أمشي أتعثر

واضج اْبْصُوت وَيَّه صيحة الخِدَّر مِن تِﮕصِد حزينه لصاحب الرايه

ما أمشي مشي .. أزحف لبو النوماس واصيح بصوت أون ماتدري ياعباس

زينب يسروها وفُرجه بين الناس طافوا بيها بين ولايه لولايه

أجي عاشور ظل مكسور بونينه من ون ولطم لمصاب عشرينه

ناعور الحزن يحسين فر بينه والموت عله حبك آنه شرايه

إلك يحسين أَمَشِيْهَا إيديه زحوف وحمامه الروح عِد ﮔبرك تحن وتطوف

زوارك نطت لجل الزياره ﭼفوف وآنه انطي العمر يلوصْلَك الغايه