أول تحية

للشاعر: علي إبراهيم الكرّاني

گربي لي يازينب گبل ميفرّگ البين وخبريني شتريدين ابلّغ خيّچ حسين؟

عجلي گبل ما ألفظ انفاس المنية گولي من اتريدين ابدّي بالتحية؟

باللي انهشم صدره ابخيل الأعوجية؟ لو باللي كسروا منها خلف الباب ضلعين؟

وصّيني واعتمدي يزينب أني ام عبّاس عندي علامات ابها أعرف خيرة الناس

نيشان اخوچ حسين لا خنصر ولا راس وامچ علامتها العصابة ولطمة العين

صاحت الحورة والدمع بالخد سايل أوّل تحية الزوم توصل لبوفاضل

وسئليه چيف اتخلي إختك دون كافل؟!! متمرمرة باطفال مدهوشة ونساوين

يم البنين الأربعة فصلي له الحال إلزوم يدري الشمر داس حسين بنعال

والزوم يدري حسين راسه فوگ عسال والزوم يدري الأعوجية رضّت حسين

وخبريه عن حالي وعن حال اليتامه واشلون حرگوا مهجتي ابحرگة اخيامه

ياليت هامي منفضخ من گبل هامه وياليت گبله گطعوا اشمالي وليمين

يم البنين المعذرة آخر وصيّة گولي له زينب دشّت ابمجلس دعيّة

وماتت على بوها من الحسرة رقيّة وايّاچ تنسي هالوصيّة يم لبنين