الزهراء و ابنها المهدي (عليه السلام)

للشاعر: حسن الحمراني

(الموشح نبطي)

يمهدي مو لجل ضلعي ولا هو الخدي الملطوم أريدك تاخذ ابثارك من اللي ذبحوا المظلوم

حرارة ﮔلبي ما تبرد ولا اللطمة على خدي و كسرة ضلعي ما تهدأ ولا يفتر ألم ﭼبدي

إلا ابطلعتك يبني لأخذ الثار يلمهدي و كلما أذكر امصابه عليّ اتحاذفت لهموم

إذا بتﮕوم يلمهدي لكسر اضلاعي و العصرة مصابي انسيته يوليدي لجل من ظل على الغبرى

أريدك تاخذ ابثارات من حز الشمر نحره و راسه انشال فوﮒ ارماح و جسمه اتغسل ابلدموم

ولا تسألني يلمهدي اشصار ابهجمة الأجناب لأنّ حسين نسّاني مصاب اجداري ويا الباب

و لا أنسى مصابه امحال و هو طايح على لتراب حاير يكسر الخاطر وحيد امحاوطينه الﮕوم

و اذا يلغايب ابﮕلبك ألم حﮓ ثار مسماري و من أفعال عدوانك و طبتهم وسط داري

أريدك يبني ثار حسين تاخذ من ﮔبل ثاري أني مظلومة بس حسين ما مثله أحد مظلوم

كل لحظة مصاب ابني يعصفني ابألم و احزان كأني أنظره طايح يويلي من ظهر لحصان

و جسمه ينحطم بالخيل و راسه يعتلي بسنان يمهدي ابيومك الموعود عجل بالظهور و ﮔوم

على المظلوم وادمعي ما أبﭼي الألم ضلعي على المظلوم آهاتي عليه طول العمر أنعي

على المظلوم ولا من يوم مثله ابعيني و سمعي على المظلوم واحزني واحزني على المظلوم