آه يا عباس

للشاعر: حسن الحمراني

تعالي اليوم يم عباس شوفي اوليدچ الغالي

فارگني وكسر ظهري افراگه وحرگ دلالي

يليتچ حاضرة ابهاليوم يم عباس وتشوفين

بعد ما طاح أبو فاضل وشحالة عضيده حسين

جيت المصرعه وشفته على الشاطي بلا چفين

وصرت ابچي على حاله وهو يبچي على حالي

لو كنتي سمعتينه يگول ودمعته ابعينه

يخويه اعلى الثرى خلني ولا اتوديني لسكينة

أخاف اتشوفني وتگول يا عمي الوعد وينه

ما أگدر أرد لخيام واسمع ضجّة أطفالي

أذكر يوم ميلاده أبويه المرتضى شاله

وطالع في جماله زين ودمعه ابوجنته ساله

وكلام ابعينه واچفوفه بعد ما طالعه گاله

وكلام الوالد ابهاليوم كله صاير اگبالي

گال الوالد اچفوفه بگطعوها ويفضخوا الراس

واذا طاح ادركه وشيله لا بخيولهم ينداس

وانا ابهاليوم يم لبنين أصرخ آه واعباس

وتعالي وشوفي يم عباس حال ابنچ دهش بالي

لو شفتين يم لحزان وضع اللي شعل حزني

ابحضني راسه خليته لكن شاله من حضني

وگلّي راسي لا اتشيله وعلى وجه الثرى خلني

رخصت الغالي لوجودك وغلاتك ما أحد غالي

إذا مات الولد گالوا إلى أمه الولد مولود

لكنّه الأخو لو مات يگولون الأخو مفگود

وانا مفگودي يم عباس مثلاته مهو موجود

واذا راح الأخو يبگى مكانه للأبد خالي

ما تم لچ ولا واحد يم الأربعة لبنين

گضوا ما بين متعفر وبين امترّب الخدين

لكن طيحة العباس كسرت ظهر اخوه حسين

ومثلاته أخو ما صار من أول ومن تالي