تناخو و السيوف اتقلدوها مشو للموت و الروس ارخصوها

عافو روسهم دون الحسين او كسروا شوجة الطف للميادين

سوقو يوم يشبه يوم صفين ضياغم و الصوارم كسروها

صوارم كسر و اللكون خيطوه او دم ابطالها جالموج خلوه

ماي العلقمي بالسيف جابوه كل جمع اليجيه اينكسه اردود

لون حيدر يشوفه ابحملة الجود نزل للمشرعه او لا منعوها

نزل بيده المذهب يشتعل نار او بيه حتف العمار او هجم الديار

حمل حملات ابوه حيدر الكرار او حامه ثايته اشحدهم دنوها

اليقرب ثايته تقرب مناياه او يومه مثل يوم الجمل سواه

نصه البيرغ او جاب المشايله اوياه ابهذاك اليوم جم رايه خذوها

خذوها او خلو الجيمان طشار او سوقو يوم بيه اتتيه الافكار

تهاوو للمنايه ابطرب و اغرار سكاره و العمايم نكسوها

عمايم نكسوا للموت يردون مثل ممشه الضواري اعليه يمشون

دون اعيالهم بالروس يصخون الشجاعه الهم ورث ما بدلوها

ورثهم بالشجاعة ارزوم الابطال او سوو يوم تضرب بيه الامثال

اشراده او طير ابابيل اعلى الافيال على و الجيمان و الثايه نصوها