في مبارزة مسلم بن عقيل و شهادته (عليه السلام)

ليش ارتجت الكوفه او راطت كل اهاليها

قالو شلع الفرسان مسلم حوم اعليها

حام اعلى الزلم و الخيل وحده او لا عمامة احضور

او من يجبل عليها اتقول حر او ضرب زانه اطيور

خلاهم نثر بالقاع بين المات و المكسور

اورد كل السبايا امروج تتخط مساميها

صك اجموعها و الشوس منه اتريد منجاها

تدري لو دنت منه دنت منها مناياها

او كل ذيج الدروب الشاش لهل الرمك حلاها

او ذرها او طعم للحوم صارت ما تغص بيها

نوه ابن الاشعث المسلم يغره بالامان ايجيه

من شاف المسامى انذبه منه خايفه اتدانيه

مسلم ما قبل منهم دره ابراي التنو بيه

صول على الجمين اردود قيمها اعلى تاليها

يويلي كثرت اجروحه او ضعف حيله او عطش ضره

او ذبة اللي رماه حربه ابظهره او جزت من صدره

خذوه مجتوف لابن ازياد و امر و اصعدوه قصره

ابحاله ايعز على الكرار جى مسلم صعد بيها

سبه المسلم ابن ازياد او مسلم رد عليه سبه

و اغضب ترثه اسميه او من عالي القصر ذبه

عقب ما هشل اعضامه المسلم امر ابسحبه

اهو او هاني ابحبل بالسوق بالكوفه او نواحيها

جيف اصبرت يا كرار هذي افعال اميه اوياك

ابمسلم ما دريت اشصار و بجلته خبر ما جاك

تغضى او بالطفوف احسين مجتول او غفت عيناك

قلي اشعاق الهاليوم لديونك تخليها