أهوال الكوفه و الشام

صبح اثنعشعاشور وصلت عيلة حسين دروازة الكوفه واهلها اطْلَعت حزبين

ناس ابسرور امعيّده و طلعت بلفراح و ناس ابحزنها و نوح تصفج راحٍ ابراح

ومن الحزن فوق السطوح ابدمع سفّاح ينادون جنكُم يا سبايا الاّ مسلمين

وزينب على ناقه بمصايبها اتِّلوّى و تصيح بيهم يا عديمين المروّه

احنا أهل بيت الامامه و النبوّه بالمصطفى الهادي وابونا اتشيّد الدّين

وابن الدّعي خاف القلوب تميل إلهم وبيّتوا ليلة ثلتّعشَر في سجنهم

وسافر ابو الباقر الدَفن حسين عنهم ابضحوة نهار و رجع يهمل دمعة العين

والمجلس الميشوم يوم اربَعتَعَش صار وقفت بنات المصطفى ما بين فجّار

وابن الدّعي قلبه اشتفى من بيت لطهار هذا يَدَهر الشّوم فعلك بالميامين

وقفت الحورا ترد على نسل الدّعي جْواب و أدّت رسالتها الوديعه بين لَجناب

من منطق الهادي وشجاعة داحي الباب و خلّت الطّاغي امحيّر ايقلّب الجفّين

هاجت ضغونه ابن الدّعي وللسّجن ردهم ونادى ابعجل ياشمر لَرض الشّام ودهم

ويلاه من قوّض من الكوفه ظعنهم وضجّوا فرد ضجّه اليتامى والنّساوين

للشّام يا حيدر بناتك سيّروها و كلما يمرّون ابمدينه شهّروها

و ادروب وعره ابعترة الهادي اسلكوها الله يَزينب من هَلمْصاب اشتقاسين

واعظم عليها ابهالدّواهي الواجهتها يوم اصبحت و اقبالها اجنازة اختها

و جتها الحوادي للمسير و طالبتها صاحت ابذاك الحال ياعباس يحسين

يحسين يا عباس دهر الشّوم ذبني ابهَالدّرب و العيله اُو بجْنازه محنّي

و هاي الثّواكل بالنّياحه شيّبنّي والرّوس منصوبه على راسي نياشين