إستنهاض الأسديات رجالهن للدفن

قلّت شِيَمكم و الحميّه يا مسلمين وين الذي ينهض يواري هالمطاعين

لبسوا مقانعنا و تخفّوا خلف لستور و احنا ابعَمَايمكم نروح و نحفر اقبور

ندفن هَلَجساد الذي بالمعركة اتنور مثل لبدور اعْلى الثّرى كلهم مزهرين

رحنا قصدنا المشرعه وجينا المعاره و شفنا جسد مرضوض واتْرَكنا حياره

أوصاله كلها امقطّعه و تسطع انواره مقطوع حتى خنصره من جفّ اليمين

بالشّمس مرمي عْلَى الثرى عريان مسلوب وقلب العدو من شوفته ينْفَت ويذوب

مطعون باضلاعه وقلبه ابسهم مصيوب يمّه رضيعه ونظن هذي جثّة حسين

و يمّه ولد مثل البدر جسمه ايتلالا وكثر الطّعن والضّرب ما غيّر جماله

ما تنحصى اجروحه امقنطر على شماله الله يساعد قلبها الفقدت هلثنين

وشفنا شباب اعْلَى الثّرى جفوفه خضيبه عرّيس جنّه و زفّته الذبحه قريبه

الله يعين الفقدته و راحت غريبه ماظنّتي بين الذّبح والعرس يومين

جثّه بليّا راس ويّا جملة ابطال كلهم عرايا امجزّرين اليوث و اشبال

شبّان و اكهول و بعد و يّاهم اطفال بسهام مذبوحه اشعظمها فجعة البين

و فتّت مرايرنا بطل يم الشّريعه مصروع لكن ذبحته والله فجيعه

حتّى من الزّندين جفّينه قطيعه صاحب علَم جنّه و سلالة هاشميّه

من شوفته اتلوح الفراسه و شدّة الباس ازنوده بليّا اجفوف و الجثّه بلا راس

و انْظن عليه الفارس المشهور عبّاس قطعوا على جوده العدا اشماله و ليمين