باب جرحك ما تسده الأزمنه شَرَّعَه الطَّف بالبواتر والقَنَا

جوّه بابك ينفتح مليون باب المسيرة البينهم ميّة سنة

من خلاله اليعبر ايلزمه الذّهول من يصد الرحمة الله المثخنة

بالجراح الأربكت أبلغ لسان وأنطقت دمعة موالي مؤمنه

رحمه لكن ...لكن ابخنصر قطيع والعجيب الخنصر أصبح مئذنة

إنتَ يا .. يا رحمة الله ابهالوجود ومستحيل الرحمة يدركها الفنا

حاولوا بالخيل طمسك يا حسين طحنوا اضلوعك ونبتت سوسنة

حاولوا بثّ الجَهِل بين العِبَاد شافوا اجروحك تبث الأنسنة

وعن ديار المصطفى حين ابعدوك صِرِت ملجأ منهو تيّه موطِنَه

حاروا ابمأرك لأن كلش عجيب عالمشاعر تملك اشقد هيمنة

جاذبيتك بيها محتارة العقول يالإلك كل روح تقصد مذعنة

أذكرك كل لحظة واشعر هم قليل وأدري تذكرني إذا موتي دنا

آنا من دونك نعم صفر اليدين خدمتك عندي يمولاي الغِنَا