ذبلت اعيونك بعد ما بيها ماي يبني لا تبچي تره اتذبّل ٱحشاي

يبني لا تبچي و دنام ابحضن ابوك و نام بين الگمر و الأكبر اُخوك

يمّه هان اعله الشماته ايخضّبوك ابدمّك و من جورهم گطعوا رجاي

خضبوك ابدمّك و دمعي نزف ودمّي بالونّه احترگ يبني ونشف

عمري خلّصته اعله عمرك بالأسف ياللي صار الموت عگبك مشتهاي

نام يالمهدك غده ذاري الثره نام يبني و وگفيتي اگبالك ضره

لمّن اخدودك شفتها ٱمعفّره اتغبّرت و اظلمّت ابعيني سماي

ٱظلمّت ابعيني السمه و ٱتذكّريت يمّه بسماتك يعبدالله و بچيت

تدري من الوالده يبني اشخذيت حيلها و نعش الأجل يركض وراي

جيت يبني و شفتك امغمّض العين وحرت أبچي اعليك لوأبچي لحسين

يمّه ٱگضّي العمر عگبك بالونين و عيب عگب حسين أگعد بالفياي

نام يالماخذ الشوف و ونستي يمن گبلك ريت حانت موتتي

شوف غسّلتك ييمّه ابدمعتي و ما تفك عينك و لا تسمع انداي