التاريخ ينقل اخبار للعالم ويبديهه

وهذا خبر عن الباب وعن معجزة داحيهه

من حرب خيبر الك اروي الاخبار لمن وصل جيش الرسول المختار

للحصن راد ايحرره امن الكفار

للامه رادلهه الخير ومن الكفر يهديهه

فرسان خصص من جموع الايمان ونصب الاول قائد اعلى الفرسان

راح لحرب خيبر لجن رد خسران

فرسانه صارت تهجيه وهوه الذي يهجيهه

ونصّب الثاني انّوبه بعد الاول ويدري الرسول بطلعته ويتأمل

وفكرك لعد هذا الأمر لو حلل

تلكَه القياده متلوك الا لعد راعيهه

وراعيهه حماي الحمه وحامي الجار ومن شاف سيد الرسل هذا اللي صار

صاح انطي باجر رايتي للكرار

ما تحلّه الا بيمناه ولغيره ما انطيهه

الكرار صار الجيش ينشد عنّه ما يعرفونه وكل فرد يتمنه

هوّه الذي مكتوبه ليه الجنّه

وحامي الحمه بهذا الحال عينه الرمد ماذيهه

وصاح الرسول ايريد حماي الدين جاه الوصي الكرار عود الحسنين

وبلمسه من جف النبوه اعلى العين

بلمسه من جف المختار لعين الوصي يشفيهه

ورايته اتسلمهه الوصي بجفه وصاح الله أكبر والنصر و يّا لاح

وبفتح باب الحصن جفه المفتاح

معجزه لسان التاريخ النه بفخر يرويهه

اتلكَاه مرحب للحصن لمن طب صاح انه مرحب بالقتال مجرب

ليوث الحرايب منّي ما تتكرّب

ومني تهاب الابطال حيث انه المربيهه

شتكول يا مرحب شتحجي شتكول هذا علي سيف الاله المسلول

عن جلمتك يا مرحب انت المسؤول

وهاك اخذ رد الكرار لجلمتك يالحاجيهه

عود الحسن من سمع جلمة مرحب ناده هله بسوح الحرايب مرحب

للحرب عندي صدر واسع مرحب

وبجفي وبسيف الدين نار الكفر اطفيهه

نار الكفر اطفيهه لاجن بالدم واشعلهه الكم لجن ريتك تعلم

هالنار الكم تستعر بجهنّم

واليزرع الشر بايد نيران يحصد بيهه

آنه الذي سمّتني امّي حيدر وغذتني أمي بلبن طاهر حيدر

دور الي بسوح الحرب لاجن حيدر

حياه سيد الاكوان بإيحاء من باريهه

وسل سيفه حيدر لجن لمّن سله بيه جتل مرحب واخذ ثاره بجتله

ونال النصر بيده وبيه اتجله

وحقق نصر هذا الدين بيمينه وبماضيهه

والمعجزه الاُخره الجرت ويه الباب خلاهه عالخندق جسر للاصحاب

وبيده سندهه وحيّر اهل الالباب

شلون الجسر جف وباب يعبر الجيش اعليهه

وتمّ النصر بالمعركه للاسلام بامر الله وبزود ابو الحمله الضرغام

وتخلدت معجزه بطول الايّام

مفخره لكل الاجيال والدهر ماناسيهه