( صك الشفاعه )

شلون لو عمري بلياليه انطوه وللملك گلبي بمعاصيه نوه

شلون لو مني انگظه هذا العمر وگامت اسنين الصبه بعيني تمر

عالوجه سيل المدامع ينهمر والجسد حيله تهدّم وانخوه

شلون من تستعرض بفكري الذنوب وبوسط بحر الندم گلبي يذوب

من كثرها اتسد على عيني الدروب و آه دفترها اشكثر مني حوه

شلون من تلتم عله اعيوني الصور والعمر كله يمر لحظة قهر

وچني ما عشت برحه الدنيه شهر والظهرمن همّه قوّس وإلتوه

شلون ليّه ايرد يهالدنيه المضه وساعة اللوح اعله دربي معرضه

وبلّغوني الرزق يبنادم گظه وظاگت بأنفاسي شمّات الهوه

شلون لو سلهم جفن عيني ونحل وإلتوه الساني وتهّدل وانشچل

والگلب من رهبة المنظر جفل وانگطع من عيني سبّاح الضوه

شلون وا نه ابين نوح العايله وبين شد جسمي بعد ما غسّله

با للحد ويّه الأهل من نزله وهالو اعليه الترايب وانثوه

شلون أول ليله لو بيها رحت موحشه وظلمه وانه الوحدي اصبحت

لا معين ولا سند مهما صحت وهيّست من لو عتي گلبي انچوه

شلون منكر لو اجه ويمي وگف وانذهلت وريج الابحلگي نشف

وكل جزء مني بمعاصيه أعترف واعله ذنبي كلهن التمن سوه

هاي أول منطقه برحلة عذاب شلون چايوم الذي ايحين الحساب

وكلمن بچفّه يجي وشايل كتاب ولا على هول الحشر واحد گوه

شلون من كل حامل اتذب الحمل والمراضع من ثگلها تنذهل

والخلگ مشدوها للباري تطل وكل گلب من رهبة المنظر هوه

هناك يبنادم لون حل الحشر لا يفيد المال لا ينفع ذخر

غير خير العمل ما ينفع عذر ولا ملاذ الگلب من عنده انزوه

هناك بيه الظفر لو نيتك تنول اتمسّك بنور الهدى من الرسول

وابولاية حيدره وحب البتول وبثره الطف ومناير نينوه

هناك لو چنت بضمانتهم تفوز وللجنان الخالده أ بظلهم تحوز

هناك بس همّه شفاعتهم تجوز ناجح المن حبهم ايمانه ارتوه

هناك كل دمعه انزلت لهل العبه بمحفل الحق والعداله چاسبه

الزهره للشيعه الشفاعه امطالبه وبيده حيدر رفرف الملته لوه

هناك حب حسين أسمى الغانمات يوفي كل اعيون لجله هاملات

بالنحر يوگف شفيع الكائنات وتحت كتره الشيعته بدمّه اوه

شوف بخت حسين دنيه وأخره سند دايم للنفوس الحايره

زيارته صك الموالي ابمحشره وحبّت الشبّاچ للوادم دوه

اتمسك بحبهم يهالتبغي النجاة إلهم الباري خلق هاي الحياة

نول ودهم گبل ميحين الممات بسلسبيل الكوثر الحَبهم روه

همّه مركب سايره البرالأمان وهمّه آ يات الشفاعه الكل زمان

همّه جرف العاطفه وبحرا لحنان وهمّه شمس النوّرتنه بقلّ هوه