( يوم ماله مثيل )

يوم صار بكربله ماله مثيل ليه دمعات الحزن لسه تسيل

يوم مر بكربله ليله بنهار خط ابواليمه بدمه المنحر مسار

مرت اسنين وتمر للعز منار ولوعته لوعه اثبتت وسط الدليل

يوم ما يحمل ثگل همه دهر ولا مثل ضيمه يمراعله البشر

فاجعه واحزانها اتفسّرالصخر إبلا شعوراعيونّه بذچره تهيل

يوم بعلومه يهزالعاطفه وللحشر تبقه المدامع ذارفه

والشمس بغروبها اتظل نازفه وتنحني الطف كربله لمن تميل

يوم منه الهظم ذاب من الهظم وچم جسم طاهر تگنطر منجسم

وچم نحرمن صدره أمسه منحرم والنهار إلتاذ بأكتاره دخيل

يوم ناحت ليه أملاك السمه أشرف اظلوع إسحگوها مهشمه

وچم رضيع الگطّع احشائه الضمه وأمسه ليل الفاجعه عليهم چفيل

يوم بيه العين ما ترضه تشوف نار كبره اتلاهبت بأرض الطفوف

وعالنهر ظلت لبو فاضل اچفوف وابخيام حسين بس لوعه وعويل

يوم بيه الگاع تتلاهب لضه والحياده اعله الترايب رابضه

هايمه وتندب بنات المرتضه والخيم نيران والمحمل ثجيل

يوم للمحشر يظل للهم صرح يا نحر بيه التعلّگ منذبح

ويا عقيله الگلب منها منجرح ويا أسيرالراح مگيود وعليل

ذوله اولاد النبي الهادي الرسول ذوله أولاد الوصي وروح البتول

ذوله يعني الدين والحق والأصول ذوله أوتاد الأرض ليهم تزيل

الهم اعيوني مدامعها جمر وابقه ليهم انتحب طول العمر

ويومهم يبقه لعد يوم الحشر نار كبره وجيل يرويها اعله جيل