( الوصيه )

يبني لو حلّ يومي وأدنت ساعتي وصيتي تكتب ياحسين بجبهتي

هاذي يبني وصيّتي بكامل وعي لو لفاني الموت ساعة مصرعي

وللرحيم بسفرتي ايحل مرجعي واجب انته التلتزم بوصيتي

يبني لو حلّ يومي وأنويت الرحيل وأصبح الساني بمحاچيه ثجيل

إكتب ابنص جبهتي صوت الدليل يا حسين البيها ألهج دنيتي

گلبي ولساني فلا بطل لهج يا حسين الصارت العمري نهج

وأدري لو منكر لفه بيها الفرج أحتمي بيها وتهوّن شدتي

يبني لو بيها جبهتي اموسّمه منهو اليوصل لجسمي ويلزمه

وياهو اليگدر يزعّل فاطمه وانه اسم حسين عزي وهيبتي

المن اخدم يولدي هذا العمر واهمل ادموعي عله الوجنه جمر

لاتظن عدهم سهل هذا الأمر وما يجازوني اعله هلّت دمعتي

لون نبضاته الگلب توگف يطيح واللسان من ايهدلّ ما ظن يصيح

يبني اختم جبهتي بسم الذ بيح تدوي صرختها بدوايرغربتي

يبني بالدم سجلت عهد الوفه ما أعوف حسين واترك موقفه

حته لو مني اذبلت يبني الشفه هالعلامه اتظل تواصل خدمتي

شنسه يبني وشترك من امصيبته انسه صدره وخيل أمّيه السحگته

لو يفارج عيني منظر رگبته دونه ريت الي إگطعوها رگبتي

يبني بين حسين والروح أتفاق لارياء ولا دغش بيه ونفاق

شلون اعوفه وماحمل عنه الفراق بگبري هذا الختم نهج ازيارتي

اتعودت يبني بضوه حبه اشوف وارتوه مني النظر بأرض الطفوف

ولون أسمه ما اجه وياي الحتوف مظلمه بليّاه تصبح حفرتي

سلوتي ابدنياي ألهج ياحسين ولون مازوره فلا تغفالي عين

منين اجيبه هناك يوليدي منين اسمه اليهونّلي ليلة وحشتي

عمري وياه ارتبط ماينفرز وچف هواه ابمهد دلالي يهز

اسمه دنيه وأخره بصدري حرز يبني من غيره اشيگّظي وحدتي

يبني غير حسين ما عدنه ذخر حين تنصف الخلايگ بالحشر

وحايره الأرواح تطلگ بالعسر هناك حب حسين أخلص صحبتي

يبني يوم البيه مرعوبه النفس وعبرتي من الرهبه بالهم تنحبس

تشرق ادموع العليه هلّت شمس وحبه اليگطّع سناسل رهبتي

لو لفه وكت القضه وصار المثول وصار يشفع للمله هناك الرسول

توصل بموكبها متعنيه البتول أتصيح خدّام ا لحسين بعهدتي

وتلتفت كلها المله متفاجئين صوت يصدر يا إلاه العالمين

ولنّه ابو اليمّه وعله اچفوفه الوتين يصيح ربي بنحري كافل شيعتي