( أشرگ چالبدر )

برز زينة هاشم وشبّانها وألوه لعلوم المنيه اعنانها

چالبدر أشرگ عله الطف وارتسم يوسف اتگول اوتجلّه من الخيم

وهبّت اتودعه بمدامعها الحرم برز شبه المصطفه الميدانها

برز واتهل الشمس من جبهته چنّه ابو الحمله وتعلّه مهرته

وسيفه يبرج چالفقار ابيمنته ولاح بعيونه العزم بركانها

لاح بعيونه العزم تجدح جدح حيدر ومغضب فلا وصف اليصح

بيمنته باب الجهنم ينفتح يهتف ابهل من مزيد إلسانها

يهتف ابصوته ويلوّح ساعده وامه مدمعها يهل واتشاهده

اتعنه يطلب رخصته من والده دونك ايگله النفس ميحانها

دونك ايگله النفس موعدها حلّ هذا فجر الغانمه التنتظره هلّ

وساعد الماناصرك يابويه شلّ وأسكنه الباري بحمم نيرانها

اسكنه الباري بحمم نار ولضه اليدري بيك وما على نصرك حظه

والله يابويه الصبر مني گظه خلها تحصد يمنتي جيمانها

خلها يابويه اتنومس هالنفس تدري عدنه الحومه ساعات الونس

وخله همي ينجلي بچتل الرجس والشهاده نصرتك شريانها

والشهاده بنصرتك كل غايتي ويا حلاها امخضّب بدم جبهتي

انته يابويه التحقق رغبتي والله ترخصني أرتجز بأكوانها

والله صاح حسين وايهل الدمع صعبه اشوفك يولدي من تنصرع

روحي لو طحت اعله حالك تنفجع وامك اشيطفي عليك احزانها

لاچن اولدي انكتب هذا الأمر الليله دمنه اعله الترايب ينهدر

والنحور الليله يالأكبر نذر بدمها تمشي امخضّبه الرضوانها