( هاي تربات الخدر)

هاي زينب والشمر يبرالها وين سيفك ياچفيل اعيالها

هاي زينب ياچفيل العايله دوهنتها اهموم عملت كربله

مأسره ودمعاتها الدم سايله ونظرت الشمّات شلّت حالها

هاي ياعباس تربات الخدر هاي زينب للشرف آية ذچر

چانت الها اصدور خوتها ستر بس جثث أمست طريحه رمالها

هاي زينب ياوريث المفخره الچانت بسدكم يحيد أمخدّره

ترضه تطلع من خدرها مأسره والهظيمه أتگطّع بدلالها

هاي زينب بالعيال امحيّره وبالصدر عبراتها أتحزّ مسعره

فوگ نوگ الهزل تمشي مكدّره گوم سبع الگنطره اتنخّالها

هاي بت حيدر يشيّال العلم منهو دگ صدره ولعد ردها ألتزم

وياهو غيرك چافل اظعون الحرم وللكلافه من تحل شيّالها

گوم سلّ سيفك يصنديد الوغه شمر حقده اعله الحراير فرّغه

شوف دلالي اشيگول امناشغه يا عميد الموزمه وخيّالها

گوم سلّ سيفك يميدان الوفه وخلهن الچفين يدونّ عاصفه

ظلوعنه من السوط أمست نازفه وفگدت اعيالك يخوي اطفالها

گوم لعيالك يحلال الشداد اندارت اعليك وتراويك الأصفاد

وآه يالوعه اللفت زين العباد والچفوف اتجرّحت بأغلالها

گوم هاذه السوط بمتوني لعب وابن اخوك الحالتي دمعه سچب

ياهظيمه الشمرّ حادينه أنتصب والهواشم عالوطيه ارجالها

حگها عيني بالمدامع فايضه حيث جرني البال للعهد المضه

واذكرت خدري يشبل المرتضه وهسّه يبره اجنازتي چتّالها