( سبع الگنطره )

گوم سل ّسيفك يسبع الگنطره هاي أميّه انوت رحيلي مأسره

گوم سلّ سيفك يصنديد الحرب لاتظل نايم على وجه الترب

انه نار الحرگه بظلوعي تشب والعده السبيتنه خويه محضّره

ياعضيدي السبيتي اتريد العده وجمرة الفرگه بدليلي اموگده

گوم ردّ بيمنتك سيل الرده ماني بظعونك يخوي امحيّره

ماني من بعدك يبو فاضل حرت وانته نايم عالثره وعني غبت

گوم ليّه بروحي ياخويه انصبت والهزل ليّه بهظمها امگوطره

گوم ياشبل الهواشم ياشهم گوم سلّ سيفك يجيدوم الزلم

حاشه لن اتعوفني بغربه انهظم گوم واطوي اليمنه فوگ الميسره

گوم ياعباس طالت نومتك صعبه يا سبع البوادي غيبتك

شابحه اعيون اليتامه الجيّتك لاتگول اچفوفي خويه امطشره

گوم لمها اچفوفك وشد العزم هاذه مظعون الفواطم ياعرم

انته بالمحمل يخوي الملتزم وانته ابن ليث الحرايب حيدره

گوم حرگت گوم أميّه امخيمك وداست خيول الأعادي امحرّمك

گوم ابو فاضل تعلّه امطهمك ماظن اتخليها روحي امكدّره

گوم ماني اختك نخيتك ياسبع شلون ترضه امخدراتك تنفجع

فرّت ومرعوبه تتهامل دمع واعتلت نار بخيمها مسعره

شلون ترضه بنومتك عني تطيل وانه مهظومه وجمرعيني تسيل

انده وما رد عليّ صوت الچفيل وينك اعلينه أميّه مأمره

خويه چن النهظتك ماظل أمل و لا يحشّم نغرتك دمعي الهمل

خويه معذور وغده جسمك وصل والچفوف بدمّ گطعها امعفّره