( بركان الضمير )

اتعنّه ابو اليمه وعله اچفوفه الچفن والمدامع دم حمرعالخد جرنّ

جدّم الحر ويخط نگل الجدم والمدامع تكشف اسرار الندم

وابنه يبراله و على خطه ألتزم سجّل بجيته نجاحه من امتحن

هزّه بركان الضمير وحشّمه لمن شاف بعينه ذيچ المظلمه

محاصر حسين وعليه امجدّمه احشود أميّه الچتلته كلهن سعنّ

يمشي لخيام الأمامه وينتحب والمدامع دم حمر گامت تصب

والندم نارا بوسط گلبه تشب والشهامه وغيرته برچبه ايحدنّ

گابل حسين ولعذره يلتمس يگله يبن الرّدت العينه الشمس

جيتك وشايلها بچفوفي النفس دونك اليوم المواضي ايهلهلنّ

جيتك أتعذر يميزان العدل وانته سبط المصطفه خير الرسل

أفزَعتكم من تلگيت الرحل ومني حرّات الزچيه اترهبنّ

گله ابو اليمه لمن يمّه وصل انهض وعذرك يهالجاي انقبل

واسمك ويه انصاري يالحران شمل بيكم اعيال الهوا شم يحتمنّ

دمدم الحر وتفاخر مبتشر ايگله والله اليوم أگرّ عينك واسرّ

بس يبو اليمه تصرّحلي الأمر وانه گطّاع الفتن حين المحنّ

ارخصه حسين وركب مهره ايهتفّ سيفه سجّيل وتولاهم عصفّ

انه حرّ وضربتي الما تنوصف صاعقه وميدانه من حلّ انرجنّ

حاوطوه وصابته سهام العده ودمّه الأتگاطر چثير ورگّده

ناده و الحومه صداه اتردده اچفوفي دخبرني يبو اليمه وفنّ

صال ابو اليمه وتعنه الحومته گابله وبچفوفه يمسح جبهته

أخره ودنيه ونعم من سمّته حر تظل وموطنك جنة عدن