( صاحت ياعلي )

ياعلي ترضاها أمشي مأسره وجسم اخوي حسين ظل اعله الثره

اندارت الصوب الغري وصاحت علي مابگه الينغر يبوالحسنين إلي

كربله اخذت يبويه كل هلي وچم جرح بيهن مشيت محيّره

چم جرح بيهن يبوي اتحزّمت ويامشاهد ضيم بالحومه شفت

للأسر عگب الفجيعه اتحضرّت بروح ممروده وتونّ امكدّره

بروح من جور الرده تلوج وتونّ وبگلب من لوعة الطف منسحنّ

والله بويه بليلي ما غَمض جفن والمصيبه بعيني تلهب مسعره

ما انام الليل والمدمع يفيض والجروح الراگده بصدري تهيض

بويه واسواط الشمر والله تغيض نار بحشاي من أهدّها اموجّره

وسفه يابويه بنات المصطفه اخدورهن عگب الحياده امكشفه

وظلت الجيمان بالطف عاكفه موسّده التربان كلها امگنطره

ياعلي ظلوا أخوتي اعله الرمال وسال دم اشبولك اعله الغبره سال

ضاعت بفرگاهم أيام الدلال وأگبلت أيام بالهم مغبره

ظل ابواليمّه صريع اعله الأرض نبض للگاع الجفه عنها النبض

وصدره فوگ اترابها يأدي الفرض وذاك مجمعنه يبوي اتحسره

آه يابويه الظعن بينه مشه وصارت بلياه روحي موحشه

گطّع فراگ الولي لبّ الحشه وتطعن الدلا ل حالت منحره

عفته يابويه عله الغبره صريع موسّد التربان والمنحر گطيع

منظره والله يابويه فضيع وجثّته بفيض الدموم معفّره

ترضه يابوالحسن أمشي اعله الهزل ترضه جسم حسين يبقه بلا غَسل

ياظليمه اخلافكم بينه تحل ولوجره همها بصخر چا فسّره