( دعوة طفله )

هم وصل يالمهدي لسماعك خبر عن رقيه الماتت بحسره وقهر

آه يالغايب خبر هالفاجعه كل گلب صوّب حشاه وصدّعه

شلون ليله الظالم أتقن صانعه من رماها بنبلة أقواس الغدر

آه يالغأيب لمنّ ناده اللعين جيبو للطفله بطشت راس الحسين

خل تشبّع اعيونها بحبل الوتين بلچن اتهيّد لمه تشوف النحر

وأحضروه الراس بالدم مختضب طاحت الطفله اعله ابوها وتنتحب

شبگته ومد معها عالوجنه يصب والعرش گلبه اعله حالتها انكسر

أتصوّر بعينك يمهد ينه الوضع طفله وبگلب اعله ابوها منفجع

عالنحر هملت نواظرها الدمع فزّزت عينه وعله بنيته نظر

شبگته بلهفت دليل اتخاطبه اتگله يابويه إمردتني النايبه

كلشي إلّه الفرگتك ماحاسبه ومن بعدعينك يصوبني القدر

اتعودت چفك يفزّزني الصبح يابعد روحي يبوالگلب السمح

شلون اشوفك هسّه بويه منذبح تنهش ابدلالي شفرات القهر

تگله ياعيني ويسلوة مهجتي شلي عگبك بيها بويه دنيتي

وياك اخذني وخلها يمك جثتي ماتسر دنيه عگب شخصك بصر

آه يابويه فلا ريد الحياة ولاغَمُض عيني بعد عينك وأبات

دعوتي ويّاك يكتبلي الممات ولا أشاهد گبرك بعيني انحفر

وحقق الباري امنيتها والدعاء بشبگت الراس وصدرأمرالقضاء

بچّت أملاك الأرض وأهل السماء وانگطع منها ويه دنياها الوتر

والله يالمهدي مصيبتها جمر عالخلگ ماظني لوعتها تمر

شيعتك تنحب عليها للحشر وكل گلب ليها تكدّر وانفطر